Gendeh. Nuay enseña el Biblia que si Maria amo el nana del Dios. Gendeh tambien este ta habla que el maga Cristiano debe adora o dale especial honor con Maria. a Considera con este:

•   Nuay gayot clama si Maria que ele amo el nana del Dios. El Biblia ya explica que ya pari le con el “Anak de Dios” y gendeh con el Dios mismo.​—Marcos 1:1, El Nuevo Testamento na Chavacano; Lucas 1:32.

•   Si Jesucristo nuay gayot habla que si Maria amo el nana del Dios o debe con ele dale especial devocion. Gane, ya corecta le con el un mujer quien ya dale especial atencion con el papel de Maria como el de suyu nana. Si Jesus ya habla: “Mas alegre pa aquellos quien ta oi y ta obedece con el Palabra del Dios.”​—Lucas 11:27, 28.

•   El maga termino “Nana del Dios” y “Theotokos” (Quien ya pari con el Dios) gendeh puede incuntra na Biblia.

•   El expresion “Reyna del Cielo” na Biblia gendeh ta refiri con Maria, sino na falso diosa que ta adora el maga apostata Israelita. (Jeremias 44:15-19) Posible, el “Reyna del Cielo” amo si Ishtar (Astarte), un diosa de Babilonia.

•   El maga primer Cristiano de antes nuay adora con Maria y nuay dale especial honor con ele. El un historiador ya habla que el maga primer Cristiano “posible nuay entra na maga culto y tan lingasa que el sobra atencion con Maria hay cae como ta adora na diosa.”​—In Quest of the Jewish Mary.

•   El Biblia ta habla que pirmi ta existi el Dios. (Salmo 90:1, 2; Isaias 40:28) Ciendo nuay le principio, nuay le nana. Mas pa, el Dios gendeh cabe na bariga de Maria. El Biblia claro ta habla que maskin el cielo gendeh puede contene con el Dios.​—1 Rey 8:27.

Si Maria​—Nana de Jesus y gendeh “Nana del Dios”

 Un Judio si Maria y descendiente le de Rey David. (Lucas 3:23-31) Ya tiene le el pabor del Dios por causa na de suyu fe y devocion. (Lucas 1:28) Ya iscuji con ele el Dios para queda nana de Jesus. (Lucas 1:31, 35) Ya tiene pa sila otro maga anak del de suyu marido, si Jose.​—Marcos 6:3.

 Maskin pa el Biblia ya dale mira que si Maria ya queda dicipulo de Jesus, nuay mas este dale omento informacion acerca con ele.​—Maga Actividad 1:14.