Manada Ba Nombre el Dios?

MAN PLAY

El contestacion del Biblia

Uno lang el personal nombre del Dios. Ya escribi este como יהוה na Hebreo y “Jehovah” na English. a Por medio na de suyu profeta si Isaias, el Dios ya habla: “Iyo si Jehova. Ese el de mio nombre.” (Isaias 42:8) Este nombre puede incuntra maga 7,000 beses na maga manuscrito del Biblia de antes. Si compara con el otro maga termino para na Dios o otro pa personal nombre, el nombre del Dios amo el de con todo manada beses puede incuntra na Biblia. b

Tiene pa ba otro nombre si Jehova?

Maskin uno lang el nombre del Dios asegun na Biblia, ta usa este manada titulo para na Dios. El siguiente lista amo el cuanto maga titulo del Dios. El cada uno de ese ta dale mira si cosa el maga calidad de Jehova.

Titulo	Texto	Si cosa quierre decir
Allah	(Nuay)	El palabra “Allah” que estaba na Arabic gendeh un personal nombre sino titulo este que quierre decir “Dios.” El maga translation del Biblia na Arabic y otro pa maga lengguaje ta usa “Allah” para na titulo “Dios.”
Todopoderoso	Genesis 17:1	Tiene incomparable poder. El Hebreo expresion ʼEl Shad·daiʹ o “Dios Todopoderoso” puede incuntra siete beses na Biblia.
El Alfa y el Omega	Revelacion 1:8; 21:6; 22:13	“El primero y el ultimo” o “el principio y el fin,” quierre decir que nuay mas ya otro Todopoderoso Dios puera con Jehova y nuay mas ya quien man sunod igual con ele. (Isaias 43:10) El alfa y omega amo el primero y ultimo maga letra na Griego alfabeto.
Antigua de Maga Dia	Daniel 7:9, 13, 22	Nuay le principio; ya existi ya le antes pa existi el maskin quien o maskin cosa.—Salmo 90:2.
Creador	Isaias 40:28	Ele ya crea o ya hace con el todo las cosas.
Tata	Mateo 6:9	Ele el ya dale vida.
Dios	Genesis 1:1	El con quien debe adora; poderoso y mafuerza. El Hebreo palabra ʼElo·himʹ amo un plural palabra que ta dale mira el dignidad, pagka-glorioso o pagka-bueno de Jehova.
Dios de maga dios	Deuteronomio 10:17	El todopoderoso Dios que otro na “maga dios que nuay sirvi” que ta adora el cuanto.—Isaias 2:8.
Grande Instructor	Isaias 30:20, 21	Ta enseña y ta guia para na diaton bien.—Isaias 48:17, 18.
Grande Creador	Salmo 149:2	Ya hace con el todo las cosas.—Revelacion 4:11.
Alegre Dios	1 Timoteo 1:11, NWT	Ele un alegre Dios.—Salmo 104:31.
El quien ta oi con el rezo	Salmo 65:2	Ta oi le mismo con el cada sincero rezo del maga gente.
Hay Queda Yo Maskin Cosa Yo Quierre Queda	Exodo 3:14	Puede le queda maskin cosa el necesita para cumpli con el de suyu proposito. Este ta hace claro si cosa quierre decir del personal nombre, Jehova, que ya menciona na sunod versiculo.—Exodo 3:15.
Dios quien ta pidi exclusivo devocion	Exodo 34:14	Quierre le que con ele lang debe adora.
Rey eterno	Revelacion 15:3	El de suyu rulanza nuay principio o fin.
Señor	Salmo 135:5	Dueño o amo; estaba na Hebreo palabra ʼA·dhohnʹ y ʼAdho·nimʹ.
Bien Alto	Salmo 47:2	Ele el tiene el de con todo alto posicion o autoridad.
De Con Todo Sagrao	Proverbio 9:10	Ele el de con todo sagrao o de con todo limpio na moral.
Ollador	Isaias 64:8	Igual si paquemodo el un ollador puede forma con el lodo pandayan, tiene autoridad el Dios con el maga gente y maga nacion.—Roma 9:20, 21.
El Quien Ta Rescata	Isaias 41:14; King James Version	Ya rescata o ya cumpra con el maga gente estaba na culpa y muerte por medio na rescate de Jesucristo.—Juan 3:16.
Piedra	Salmo 18:2, 46	Un refugio y quien ta dale salvacion.
Salvador	Isaias 45:21	Ta salva kanaton desde na peligro o destruccion.
Pastor	Salmo 23:1	Ta cuida con el de suyu maga siervo.
Soberano Señor	Genesis 15:2	Tiene el de con todo alto autoridad; estaba na Hebreo palabra ʼAdho·naiʹ.
El Supremo	Daniel 7:18, 27	El quien tiene el de con todo alto soberania.

Nombre del maga lugar que ya menciona na Hebreo Escritura

El cuanto maga lugar que ya menciona na Biblia yan base na nombre del Dios. Pero gendeh este maga nombre del Dios.

Nombre del lugar	Texto	Si cosa quierre decir
Jehova-jireh	Genesis 22:13, 14	“Hay Dale si Jehova.”
Jehova-nisi	Exodo 17:15	“Si Jehova el De Mio Poste de Señal” o “de mio Bandera.” (Today’s New International Version) Si Jehova el Dios quien puede dale proteccion y ayuda con el maga gente.—Exodo 17:13-16.
Jehova-salom	Juez 6:23, 24	“Si Jehova Paz.”
Jehova-sama	Ezequiel 48:35, footnote, American Standard Version	“Si Jehova Ta Esta Alla.”

Maga razon si porque kita debe sabe y usa con el nombre del Dios

Importante para con Dios el de suyu personal nombre, Jehova, cay ya manda le se escribi miles de beses alli na Biblia.—Malaquias 1:11.
El Anak del Dios, si Jesus, ya dale grande importancia con el nombre del Dios. Por ejemplo, ya reza le con Jehova: “Dale gloria con el de Uste Nombre.”—Mateo 6:9, El Nuevo Testamento na Chavacano; Juan 17:6.
Para queda amigo de Jehova, debe kita sabe y usa con el nombre del Dios. (Salmo 9:10; Malaquias 3:16) Aquellos quien tiene buen relacion con Dios ta puede beneficia con el de suyu promesa: “Cay ta ama le conmigo, hay salva yo con ele. Protege yo con ele cay sabe le de mio nombre.”—Salmo 91:14.
El Biblia ya habla: “Bien mucho na cielo o na mundo, el maga dios-dios y maga señor-señor, como ta llama sila con esos.” (1 Corinto 8:5, 6) Pero ya manda conoce el Biblia con el solamente verdadero Dios, si Jehova.—Salmo 83:18.

a El cuanto maga Hebreo scholar yan uyun que usa “Yahweh” para na nombre del Dios.

b El corto nombre del Dios que “Jah” ta aparece maga 50 beses na Biblia, incluido ya alli na maga termino “Hallelujah” o “Alleluia” que quierre decir “Alaba con Jah.”—Revelacion 19:1; American Standard Version; King James Version.