El “Nuevo Jerusalem,” un expresion que puede le dos beses na Biblia, amo un simbolico ciudad que ta representa con el grupo del maga siguidores de Jesus quien subi na cielo para rula junto con ele na Reino del Dios. (Revelacion 3:12; 21:2, El Nuevo Testamento na Chavacano) Na Biblia, ta llama tambien con este grupo como el novia del Cristo.

1.   Na cielo el Nuevo Jerusalem. Cada vez ta discuti el Biblia con el Nuevo Jerusalem, ta menciona este que el Nuevo Jerusalem ta abaja estaba na cielo, donde el maga angel ta guarda con el maga grande puerta del ciudad. (Revelacion 3:12; 21:2, 10, 12) Mas pa, el grandor de este ta dale prueba que gendeh este aqui na tierra. Cuadrao este que tiene grandor de “12,000 estadio” alrededor. a (Revelacion 21:16, NWT) El cada lao de este hay alcanza cerca 560 kilometro el largor que alcanza hasta na space.

2.   El Nuevo Jerusalem amo un grupo de maga siguidores de Jesus, el novia del Cristo. Ya llama con el Nuevo Jerusalem como “el Esposa del Carnero.” (Revelacion 21:9, 10) Na este simbolico representacion, el Carnero o el Cordero amo si Jesucristo. (Juan 1:29; Revelacion 5:12) “El Esposa del Carnero,” el novia del Cristo, ta representa con el maga Cristiano quien man junto con Jesus na cielo. El Biblia ya compara con el relacion de Jesus na este maga Cristiano como relacion del un marido y mujer. (2 Corinto 11:2; Efeso 5:23-25) Omento pa, escribido na maga piedra del fundacion del Nuevo Jerusalem el “maga nombre del maga Doce Apostol del Carnero.” (Revelacion 21:14) Este detalle ta ayuda kanaton para sabe el identificacion del Nuevo Jerusalem, ciendo el maga Cristiano quien hay subi na cielo amo ‘parte de un casa, donde el maga profeta y maga apostol amo el fundacion.’​—Efeso 2:20.

3.   Parte del un gobierno el Nuevo Jerusalem. El Jerusalem de antes amo el centro ciudad del Israel, donde si Rey David, de suyu anak si Solomon y el diila maga descendiente ya rula “na trono de Jehova.” (1 Cronicas 29:23) Entonces, el Jerusalem que ya llama “el sagrao ciudad” ya representa con el rulanza del Dios por medio na linea de David. (Nehemias 11:1) El Nuevo Jerusalem que ya llama tambien como “el Ciudad Sagrao” amo aquellos quien man junto con Jesus na cielo “para goberna con el mundo.”​—Revelacion 5:9, 10; 21:2.

4.   El Nuevo Jerusalem hay lleva bendicion con el maga gente na tierra. El Biblia ya menciona que el Nuevo Jerusalem “ta abaja del cielo ta sale con el Dios.” Este ta dale mira que ta usa con este el Dios para hace maga cosas apuera del cielo. (Revelacion 21:2) Este quierre decir que tiene coneccion el Nuevo Jerusalem na Reino del Dios que ta usa el Dios para hace el de suyu querrer ‘na mundo igual como na cielo.’ (Mateo 6:10) Incluido este maga bendicion na proposito del Dios para na maga gente aqui na tierra:

   •   Quita con el pecado. “El rio del agua del Vida” ta corre estaba na Nuevo Jerusalem y ta suporta con el “Pono de Vida” para puede cura con el maga nacion. (Revelacion 22:1, 2) Este fisical y espiritual curada hay quita con el pecado y hace posible para na maga gente que tiene perfecto vida como cosa el original proposito del Dios.​—Roma 8:21.

   •   Buen relacion entre con Dios y na maga gente. Por causa na pecado, ya queda separtao el maga gente con Dios. (Isaias 59:2) Si nuay mas ya el pecado, hay cumpli ya gayot este profecia: “Este amo el casa del Dios entre na maga gente. Ay planta Le su casa entre canila y ay queda sila el disuyo maga gente y Ele, el-Dios-junto-canila, ay queda el diila Dios.”​—Revelacion 21:3.

   •   Nuay mas ya sufrimiento y muerte. Por medio na Reino del Dios, “ay limpia Le el lagrimas na diila maga ojos y nunca mas ay tene muerte, ni dolor, ni tristeza.”​—Revelacion 21:4.