Cosa Quierre Decir del Ley “Ojos por Ojos”?
El contestacion del Biblia
El ley “ojos por ojos” amo parte del Ley del Dios que ya dale con Moises na tiempo del Israel de antes. Ya menciona este si Jesus na de suyu Sermon na Monte. (Mateo 5:38, El Nuevo Testamento na Chavacano; Exodo 21:24, 25; Deuteronomio 19:21) Este quierre decir que si castiga con el un persona, el castigo debe justo na crimen que ya hace le. a
Este ley aplicable na maga intencional crimen que ya hace na un persona. Acerca na intencional criminal, el Ley de Moises ya habla: “Bukuk para na bukuk, ojos para na ojos, diente para na diente, el cosa le ya hace con otro amo debe hace con ele.”—Levitico 24:20.
Cosa el proposito del ley “ojos por ojos”?
El ley “ojos por ojos” nuay dale autoridad con el un persona para vengga con otro. Sino, ya ayuda este con el maga juez para dale justo castigo que gendeh bien sobra y gendeh bien liviano.
El ley ya ayuda tambien sangga con el un persona para gendeh le plaña hace sinti duele con otro. Asegun na ley “aquellos quien puede oi [que ya sentencia con el un persona] hay tiene miedo y nunca mas sila hace ansina clase de maldad entre con ustedes.”—Deuteronomio 19:20.
Aplicable ba para na maga Cristiano el ley “ojos por ojos”?
Este ley gendeh aplicable para na maga Cristiano. Parte este del Ley de Moises que ya termina por medio na muerte de Jesus.—Roma 10:4.
Maskin pa, el ley ta dale kanaton mira si cosa el na pensamiento del diaton Dios. Por ejemplo, este ta dale mira que importante con Dios el justicia. (Salmo 89:14) Ta revela tambien este con el de suyu principio acerca na justicia—que debe disciplina con el quien ya culpa “na justo manera.”—Jeremias 30:11.
Maga gendeh justo idea acerca na ley “ojos por ojos”
Gendeh justo idea: El ley “ojos por ojos” sobra de brutal.
Verdad: El ley nuay permiti que implementa con el castigo na brutal manera. Sino, si aplica con este enbuenamente, el maga cualificao juez hay dale lang con el castigo na un crimen despues considera con el todo circumstancia y despues determina si intencional ba el crimen o gendeh. (Exodo 21:28-30; Numero 35:22-25) Poreso, el ley “ojos por ojos” ta ayuda para evita con el brutal castigo.
Gendeh justo idea: El ley “ojos por ojos” ta permiti con el un persona para vengga con otro.
Verdad: El Ley de Moises mismo ya habla: “No tu vengga ni siembra agrabio contra con el de tuyu maga projimo.” (Levitico 19:18) En vez que anima con el maga gente que vengga, el Ley ta anima kanila que confia con Dios y con el legal sistema que ya pone el Dios para corecta con el maga kamali.—Deuteronomio 32:35.
a Ta llama tambien con este principio na Latin como lex talionis. Ta sigui tambien con este ley el maga gente de antes.
Baka Gusta Tambien Tu
CONTESTACION NA MAGA PREGUNTA ACERCA NA BIBLIA
Cosa Ta Habla el Biblia Acerca na Vengganza?
El consejo estaba na Biblia ya puede ayuda con el manada para resisti con el deseo que vengga.
EL BIBLIA PUEDE CAMBIA CON EL VIDA
Quierre Yo Quita con el Injusticia
Si Rafika ya entra na un grupo que quierre quita con el injusticia. Pero, ya puede le sabe el promesa na Biblia que el Reino del Dios lang el puede dale paz y justicia.
ACERCA KANAMON
Man Request que Visita Contigo
Discuti un pregunta na Biblia o sabe mas acerca con el maga Testigo de Jehova.