Como un espiritu, el Diablo ta queda na lugar que gendeh ta puede mira el gente. Pero gendeh este un infierno donde ta hace le sufri con el maga malo, igual na cosa kita puede mira na letrato na este articulo.

“Guerra na cielo”

 Por cuanto tiempo, ya permiti con Satanas que esta na cielo y atraca cerca con Dios junto con el maga fiel angel. (Job 1:6) Pero el Biblia ya predicta que hay tiene “guerra na cielo” donde el resulta de ese amo manda sale con Satanas na cielo y “buta para abajo na mundo.” (Revelacion 12:7-9, El Nuevo Testamento na Chavacano) El Biblia y el maga suceso na mundo ta dale prueba que ya sucede ya este guerra na cielo. Ahora, taqui ya si Satanas na tierra.

 Quierre decir ba este que el Diablo ta queda na un especifico lugar aqui na tierra? Por ejemplo, ya habla na Biblia que el ciudad de Pergamo de antes amo el lugar “donde si Satanas tiene el disuyo trono” y “donde ta queda si Satanas.” (Revelacion 2:13) El deverasan, este maga expresion posible ta dale mira que mayoria del maga gente na ese ciudad ta adora con Satanas. El Biblia ta habla que el Diablo ta rula con “todo el maga reino del mundo.” Poreso gendeh le ta esta na un especifico lugar sino na alrededor de este mundo.​—Lucas 4:5, 6.