El Biblia nuay cosa ta menciona acerca na Halloween, un holiday que ta celebra el manada na Octubre 31 cada año. Pero, el maga tradicion y si onde ya origina el Halloween gendeh tan uyun na maga enseñanza del Biblia.

Na este articulo

•  Historia y maga tradicion de Halloween

•  Importante ba si onde ya origina el Halloween?

•  Porque con este ta llama Halloween?

•   Samhain: El Halloween ya origina na “fiesta del maga pagano de antes que ta celebra el maga Celt mas de 2,000 año ya el ya pasa,” ya habla el The World Book Encyclopedia. “Ta creé el maga Celt que na ese tiempo, el maga muerto ta puede man junto na maga vivo. Durante el Samhain, el maga vivo puede visita con el maga muerto.”—Mira con el “ Porque con Este Ta Llama Halloween?”

•   Maga costume, candy y trick or treat: Asegun na un referencia, el cuanto na maga Celt ya usa maga maka-miedo costume para pensa el maga espiritu “que igual sila kanila” y gendeh mas este mete kanila. El otro ta ofrece maga dulce comida na maga espiritu para gendeh este rabia kanila. a

   Na Europe, durante el Middle Ages, el clero de Catolico ya acepta maga local practica de maga pagano y ya manda con el diila maga miembro anda casa en casa usando el maga costume para pidi maga diutay regalo.

•   Maga buruju, vampira, werewolf, maga quien ta hace barang y zombie: Ya dura ya este tiene coneccion na maga mal espiritu. Ta refiri kanila el libro Halloween Trivia como “maga supernatural monster” y ya habla que este maga creatura “tiene gayot coneccion na muerte, na maga muerto o na miedo na muerte.”

•   Maga Halloween pumpkin: Na Britain, del Middle Ages, el maga gente “ta anda casa en casa para pidi comida en cambio na un rezo para na maga muerto” y ta carga sila “maga lampara que ya hace usando el singkamas que tiene candela y ese ta representa un alma que talli na purgatorio.” (Halloween—From Pagan Ritual to Party Night) El cuanto referencia ta habla que ta usa con este para manda sale con el maga mal espiritu. Na maga año 1800 na North America, ya cambia sila con el singkamas na pumpkin o calabasa cay mas manada sila de este y facil con este forma como lampara que ta usa na Halloween.

 Si. Maskin ta pensa el cuanto maga gente que un alegre ocasion y nuay peligro el Halloween, el cosa ta hace el maga gente para celebra con este gendeh uyun na cosa ta enseña el Biblia. El Halloween base na maga falso creencia acerca na maga muerto y maga espiritu que gendeh ta puede mira o maga demonio.

 Nota con el cuanto maga versiculo que ta dale mira si cosa el mirada del Dios acerca na maga creencia que tiene que hace na Halloween:

•   “Nuay debe ni uno con ustedes el . . . tan cuento na maga buruju o espiritu, o ta llama con el maga muerto.”—Deuteronomio 18:10-12, The Jerusalem Bible.

   Si cosa quierre decir: Gendeh aceptable con Dios que comunica con el maga muerto o maskin pretende lang que comunica kanila.

•   “El maga muerto no sabe ni nada.”—Eclesiastes 9:5.

   Si cosa quierre decir: Cay el maga muerto no sabe ni nada, gendeh sila puede comunica con el maga vivo.

•   “No . . . ustedes tiene comunion con el maga Demonio. No puede ustedes toma el Copa del Señor y el copa del maga Demonio.”—1 Corinto 10:20, 21, El Nuevo Testamento na Chavacano.

   Si cosa quierre decir: Aquellos quien quierre tene el favor del Dios debe evita con el maskin cosa que tiene que hace na maga demonio.

•   “Resisti el maga ataque del Demonio: Cay el diaton maga contrario . . . el maga espiritu malo.”—Efeso 6:11, 12.

   Si cosa quierre decir: El maga Cristiano debe resisti con el maga mal espiritu y gendeh pretende que celebra junto kanila.