Si, cay el Dios quierre que el maga gente man junto-junto para adora con ele. El Biblia ta habla: “Pensa kita pirmi si paquemodo kita puede ayuda con el di aton maga hermano na fe para ama kita con uno y otro, y para puede kita hace maga buen trabajo. Y no descansa de ajuntar [o man junto] con el maga otro creyente.”—Hebreo 10:24, 25, El Nuevo Testamento.

 Ya dale mira si Jesus que el de suyu maga siguidores hay forma un organizao grupo cuando ya habla le kanila: “Ansina ay sabe todo el maga gente cay ustedes dimio maga dicipulo: Si tiene ustedes amor con uno y otro.” (Juan 13:35, El Nuevo Testamento na Chavacano) Para puede dale mira con este amor, el maga dicipulo de Jesus necesita asocia con el diila maga hermano y hermana na fe. Hay organiza kanila na maga congregacion que regular tan junto para na adoranza. (1 Corinto 16:19) Hay queda sila como man hermano y hermana na entero mundo.—1 Pedro 2:17.

Gendeh bastante que queda lang parte del un religion

 Maskin pa el Biblia ta dale mira que el maga gente debe man junto para na adoranza, gendeh este ta enseña que bastante ya queda parte del un religion para hace alegre con Dios. Para aproba el Dios con el un persona, debe tiene efecto el religion na de suyu vida. Por ejemplo, el Biblia ta habla: “El deverasan y perfecto religion na ojos del Dios, el diaton Tata, amo este: Ayuda con el maga iluh y maga viuda na diila maga necesidad y desaleja con todo maga cosa-cosa malo na mundo.”—Santiago 1:27.