El esfuerzo del maga gente que lleva paz na mundo gendeh gayot tiene buen exito por causa na mucho razon:

•   “Gendeh para na gente que guia maskin el de suyu paso.” (Jeremias 10:23) Nuay crea el Dios con el maga gente que tiene el abilidad o derecho para rula con el diila mismo cuerpo, poreso gendeh gayot sila puede lleva permanente paz.

•   “No ustedes confia con el maga principe ni con el anak del gente quien no puede salva. Hay sale el de suyu espiritu y bira este na tierra; na ese dia, hay perde el de suyu pensamiento.” (Salmo 146:3, 4) El maga lider del gobierno, maskin aquellos tiene justo motivo, gendeh puede dale permanente solucion na guerra.

•   “Ay tene maga dificultad na ultimo maga dia. El maga gente ay queda . . . salvaje, enemigo de todo maga cosa-cosa bueno, traidor, atrivido, loco o orgullo.” (2 Timoteo 3:1–4) Ta vivi kita na “ultimo maga dia” na este mal mundo donde dificil tiene paz por causa na maga custumbre del maga gente.

•   “Macalastima con el tierra y el mar, cay el demonio ya abaja alli bien rabiao, cay sabe le que contao lang el disuyo maga dia.” (Revelacion 12:12) Ya buta con el enemigo del Dios, el Diablo, na mundo y ya influencia le con el maga gente que hace malo. Mientras ele pa “el Principe de este mundo,” gendeh gayot kita puede vivi con paz aqui na tierra.—Juan 12:31.

•   “[El Reino del Dios] hay machaca y termina con este todo maga reino [quien tan contra con Dios] y este solamente hay esta hasta para cuando.” (Daniel 2:44) Gendeh igual na gobierno del gente, el Reino del Dios lang el puede dale kanaton el permanente paz na mundo.—Salmo 145:16.