Manada quien ta pregunta con este amo aquellos quien ya perde el maga riqueza o familia durante el Holocaust. Gendeh lang contestacion sila ta busca sino comforta tambien. El otro ta considera con este como el de con todo malo que ya hace el gente y como resulta, tan dificil sila creé que tiene Dios.

 Falso: Gendeh kita debe pregunta acerca si porque el Dios ya permiti con el Holocaust.

 Verdad: Tiene maga gente quien tiene grande fe el ya pregunta si porque el Dios ta permiti con el maldad. Por ejemplo, si profeta Habacuc ya pregunta con Dios: “Porque tu ta permiti que tiene violencia, rebelion, crimen y maldad maskin onde?” (Habacuc 1:3, Contemporary English Version) En vez de regaña con Habacuc, el Dios ya manda escribi con ese maga pregunta na Biblia para puede le el todo.

 Falso: Nuay queber el Dios na sufrimiento del maga gente.

 Verdad: Ta odia el Dios con el maldad y sufrimiento. (Proverbio 6:16-19) Na tiempo de Noe, “ya queda triste” el Dios por causa na violencia que ta sucede na tierra. (Genesis 6:5, 6) Asigurao que ya sinti tambien duele el Dios por causa na Holocaust.—Malaquias 3:6.

 Falso: El Holocaust amo el castigo del Dios con el maga Judio.

 Verdad: Ya permiti el Dios con el maga Romano que destroza con el Jerusalem del primer siglo. (Mateo 23:37–24:2) Pero, desde aquel tiempo, nuay el Dios iscuji un particular raza para bendici o para castiga. Para con Dios, “noay mas diferencia entre maga Judio y maga Griego.”—Roma 10:12, El Nuevo Testamento na Chavacano.

 Falso: Si tiene amable y todopoderoso Dios, era ya sangga le que sucede el Holocaust.

 Verdad: Maskin gendeh el Dios ta causa maga sufrimiento, tiene vez ta permiti le que temporario este sucede.—Santiago 1:13; 5:11.

 Ya permiti el Dios que sucede el Holocaust por causa na igual razon si porque le ya permiti con el todo sufrimiento del gente: para dale contestacion na maga acusacion que ya hace largo tiempo ya el ya pasa. El Biblia claro ta indica que ahora, el Diablo amo el ta rula con el mundo, gendeh el Dios. (Lucas 4:1, 2, 6; Juan 12:31) Tiene dos detalle na Biblia que dale kanaton mira si porque el Dios ya permiti que sucede el Holocaust.

1.   Ya crea el Dios con el maga gente que tiene libertad para hace decision. Ya habla el Dios con el primer gente, si Adan y Eva, si cosa sila debe hace, pero nuay le kanila forza para obedece con ele. En vez de obedece con Dios, ya decidi sila para na diila mismo cuerpo si cosa el bueno y malo. El diila mal decision—incluido ya el semejante decision del maga gente na entero historia—ya resulta na sufrimiento del todo gente. (Genesis 2:17; 3:6; Roma 5:12) Igual este na cosa ta habla na libro Statement of Principles of Conservative Judaism: “Mayoria del sufrimiento del mundo ahora amo cay gendeh kita ta usa na justo manera con el diaton libertad para hace decision.” En vez de quita con ese libertad, el Dios ta dale pa tiempo con el maga gente para pruba hace maga cosas que independiente con ele.

2.   El Dios hay quita con el todo sufrimiento que ya causa el Holocaust. El Dios ya promete que hace le vivi otravez con el millones de gente quien ya muri, incluido ya aquellos quien ya queda victima de Holocaust. Hay quita tambien le el dolor que ya sinti aquellos quien ya salva na Holocaust. (Isaias 65:17; Maga Actividad 24:15) Por causa na amor del Dios para na maga gente, puede kita asigura que hay cumpli le con este maga promesa.—Juan 3:16.

 Manada maga victima de Holocaust el ya puede esta fiel y ya tiene proposito el vida cay ya entende sila si porque el Dios ya permiti con el maldad y si paquemodo le con este ta plaña quita.