Si. El Biblia y el maga experiencia ta dale mira que ta contesta el Dios con el maga rezo. El Biblia ta habla: “Ta satisfecha [el Dios] el deseo de aquellos quien ta tiene miedo con ele; ta oi le con el diila pidida de ayuda y ta salva le kanila.” (Salmo 145:19) Pero, ta depende siempre contigo si contesta ba el Dios de tuyu rezo.

Si cosa el importante con Dios

•   Necesita kita reza con Dios, gendeh con Jesus, Maria, na maga santo, angel o na imagen. Si Dios Jehova solamente “el quien ta oi con el rezo.”​—Salmo 65:2.

•   Necesita kita reza harmonia na voluntad del Dios, que puede incuntra na Biblia.​—1 San Juan 5:14.

•   Necesita kita reza na nombre de Jesus y conoce de suyu autoridad. Si Jesus ya habla: “Noay quien ay puede anda con el Tata si gendeh por medio dimio.”​—Juan 14:6, El Nuevo Testamento na Chavacano.

•   Necesita kita reza con fe. Si necesita, pidi que omenta el de tuyu fe.​—Mateo 21:22; Lucas 17:5.

•   Queda humilde y sincero. El Biblia ya habla: “Maskin alto si Jehova, ta pone le atencion con el humilde.”​—Salmo 138:6.

•   No descanza pidi. Si Jesus ya habla: “Pidi ustedes y ay recivi.”​—Lucas 11:9.

Si cosa el gendeh importante con Dios

•   El de tuyu raza o nacionalidad. “El Dios noay favorito, pero ta acepta le con todo aquellos quien ta adora con Ele y ta hace cosa bueno, maskin de donde nacion sila.”​—Maga Actividad 10:34, 35.

•   El de tuyu posicion si ta reza. Puede tu reza con Dios mientras ta sinta, ta agacha, ta hinca o ta para.​—1 Cronicas 17:16; Nehemias 8:6; Daniel 6:10; Marcos 11:25.

•   Si reza tu suena o silencio. Ta contesta tambien el Dios con el silencio maga rezo que el otro gendeh ta puede nota.​—Nehemias 2:1-6.

•   Si el de tuyu problema grande o diutay lang. El Dios ta anima contigo que “deja todo el [de tuyu] maga lingasa con Ele, cay Ele ta cuida [contigo].”​—1 Pedro 5:7.