Nuay menciona el Biblia acerca na pumada a o otro pa usada de tabaco. Pero, ta contene este maga principio que ta dale mira que no quierre el Dios con este mabuling vicio que tiene mal efecto na salud y ta mira con este como un pecado.

•   Respeto na vida. “El Dios . . . ta dale el vida y el resuello y todo maga cosa-cosa con todo el maga gente.” (Maga Actividad 17:24, 25, El Nuevo Testamento na Chavacano) Ciendo el vida un regalo estaba con Dios, gendeh kita debe hace maskin cosa que puede hace corto con el diaton vida, igual como na pumada. El pumada amo el uno de maga primer causa de muerte na entero mundo que puede era previni.

•   Amor na projimo. “Ama con el dituyo vecinos, como ta ama tu con el dituyo mismo cuerpo.” (Mateo 22:39) El un persona quien ta puma entre na maga gente gendeh ta dale mira amor kanila. Grande el posibilidad que aquellos quien pirmi ta puede ole con el humu del cigarillo hay tiene maga enfermedad que tiene aquellos quien ta puma.

•   Debe queda sagrao. “Ofrece el de ustedes maga cuerpo con el Dios igual como un sacrificio vivo, santo [“sagrao,” NWT] y que Ele ta gusta.” (Roma 12:1) “Limpia kita todo mancha na diaton cuerpo o espiritu, y por causa del miedo con el Dios, queda kita santo [“sagrao,” NWT] gayot.” (2 Corinto 7:1) El un persona quien ta puma gendeh sagrao​—quierre decir, limpio y puro—​ciendo intencional le ta pone maga cosas que peligroso na de suyu cuerpo.

 El Biblia gendeh ta menciona acerca na marijuana o otro pa droga que semejante con ese. Pero, tiene este maga principio que ta dale mira que gendeh justo el usada de este maga cosas que maka-addict para lang entretene el maga gente. Puera na maga ya menciona ya, aplicable tambien este siguiente maga principio:

•   Necesita kita controla con el diaton pensamiento. “Ama con el Señor, el dituyo Dios, . . . con todo el dituyo pensamiento.” (Mateo 22:37, 38) “Desaleja na de ustedes pensamiento todo el maga estorbo, controla con esos.” (1 Pedro 1:13) El un persona gendeh puede controla enbuenamente con el de suyu pensamiento si ta usa le droga y manada maga gente el yan addict pa gane con ese. Centro el diila pensamiento gendeh na maga buen cosas sino na usada de droga y si paquemodo obtene con ese.​—Filipo 4:8.

•   Obedece con el ley del gobierno. “Necesita [kita] somete con el maga gobernador y maga autoridad del gobierno.” (Tito 3:1) Na manada lugar, tiene maga ley que ta controla con el usada de cuanto droga. Si quierre kita hace alegre con Dios, debe kita obedece con el secular autoridad.​—Roma 13:1.