Si. El Biblia amo un libro de sabeduria que ta dale contestacion na maga importante pregunta na vida. Puede este ayuda contigo para tiene alivio y queda alegre. Considera con el cuanto maga pregunta que ta contesta el Biblia:

1.   Tiene ba Creador? El Biblia ta habla que el Dios ‘ya crea todo el maga cosas.’ (Revelacion 4:11, El Nuevo Testamento) Ciendo ele el ya crea kanaton, sabe le si cosa kita necesita para queda kita alegre y satisfechao na diaton vida.

2.   Ta ama ba conmigo el Dios? El cuanto ta pensa que nuay queber el Dios con el maga gente. Pero el Biblia ta habla que “gendeh Ele . . . lejos canaton.” (Maga Actividad 17:27, El Nuevo Testamento na Chavacano) Interesao le na cosa ta sucede contigo y quierre le ayuda contigo para tiene alegre vida.—Isaias 48:17, 18; 1 Pedro 5:7.

3.   Cosa el maga beneficio si conoce yo con Dios? El Dios ya crea kanaton que tiene “espiritual necesidad” o natural deseo que entende si cosa el proposito del vida. (Mateo 5:3, NWT) Incluido tambien aqui el deseo que conoce con el diaton Creador y queda de suyu amigo. Hay aprecia el Dios con el de tuyu esfuerzo que conoce con ele cay el Biblia ta habla: “Atraca con Dios y Ele ay atraca con ustedes.”—Santiago 4:8.

 Millones el ya puede experiencia que desde ya queda sila amigo del Dios, ya queda sila mas alegre y contento na diila vida. Gendeh este quierre decir que gendeh mas tu tiene problema. Pero el sabeduria na Biblia puede ayuda contigo para

•   Tiene mas alegre familia.

•   Tiene paz y buen relacion con otro.

•   Enfrenta con el diferente maga problema igual con el depression, lingasa na sen y grabe enfermedad.

 Manada religion el gendeh ta sigui con el maga enseñanza del Biblia maskin ta usa sila con este. Gendeh igual kanila, el verdadero religion ta sigui si cosa deverasan ta enseña el Biblia. Ese clase de religion hay ayuda contigo para conoce con Dios.