Puede tu queda cerca con Dios si aprende tu acerca con ele y hace maga cosas que ta hace alegre con ele. Si hace tu se, el Dios “ay atraca [contigo].” (Santiago 4:8, El Nuevo Testamento na Chavacano) El Biblia ta asigura kanaton que “hende man ele lejos canaton todo.”—Maga Actividad 17:27, El Nuevo Testamento.

•  Maga manera para queda cerca con Dios

•  Maga gendeh justo idea acerca na relacion con Dios

 Le con el Biblia

•  Si cosa el Biblia ta habla: “Todo el maga Escritura inspirao de Dios.”—2 Timoteo 3:16.

•  Si cosa quierre decir: El Dios el Autor del Biblia. Ya guia le con el maga escritor del Biblia para escribi con el cosa le ta pensa. Por medio na este especial libro, ya dale mira el Dios si cosa el de suyu querrer para kanaton. Ya dale tambien le mira con el aspeto del de suyu personalidad, incluido el de suyu amor, justicia y lastima.—Exodo 34:6; Deuteronomio 32:4.

•  Si cosa tu puede hace: Le con el Biblia cada dia. (Josue 1:8) Pensa con el cosa tu ta le y pregunta na de tuyu mismo cuerpo: ‘Cosa este ta enseña conmigo acerca con Dios?’—Salmo 77:12.

   Como ejemplo, le con el Jeremias 29:11 y despues, pregunta na de tuyu mismo cuerpo: ‘Cosa quierre el Dios para conmigo—paz o calamidad? Ta vengga ba le o quierre le que tene yo un buen futuro?’

 Observa con el maga creacion

•  Si cosa el Biblia ta habla: “El de suyu maga invisible calidad claro puede mira desde el creacion del mundo, cay este . . . puede mira na maga cosas que ya hace le.”—Roma 1:20, NWT.

•  Si cosa quierre decir: El maga creacion del Dios ta revela con el maga aspeto del de suyu personalidad, igual si paquemodo kita puede mas conoce con el artist por medio na art que ya hace le o con el un inventor por medio na invencion que ya hace le. Para ilustra, el capacidad y pagka-complicao del utuk del gente ta revela con el sabeduria del Dios. Mas pa, maskin grande el energia que estaba na sol y na otro maga estrellas, ta puede siempre se controla el Dios y ta dale se mira con el de suyu poder.—Salmo 104:24; Isaias 40:26.

•  Si cosa tu puede hace: Dale tiempo para observa y aprende acerca na maga creacion. Mientras ta hace tu se, pregunta na de tuyu mismo cuerpo, ‘Cosa ta revela acerca con Dios el maga bonito diseño na creacion?’ a Siempre, manada pa cosas acerca con Dios el gendeh kita puede aprende si observa lang kita con el maga creacion. Poreso, ya dale le kanaton el Biblia.

 Usa con el nombre del Dios

•  Si cosa el Biblia ta habla: “Protege yo con ele cay sabe le de mio nombre. Hay llama le conmigo y hay contesta yo con ele.”—Salmo 91:14, 15.

•  Si cosa quierre decir: El Dios que el nombre Jehova ta dale especial atencion con aquellos quien sabe el de suyu nombre y ta usa con este con respeto. b (Salmo 83:18; Malaquias 3:16) Cay ya habla le con el de suyu nombre, ya introduci el Dios con el de suyu mismo cuerpo kanaton. “Iyo si Jehova. Ese el de mio nombre,” ele ya habla.—Isaias 42:8.

•  Si cosa tu puede hace: Usa con el nombre de Jehova si ta refiri tu con ele.

 Man cuento con Jehova por medio na rezo

•  Si cosa el Biblia ta habla: “Si Jehova cerca con aquellos quien ta llama con ele.”—Salmo 145:18.

•  Si cosa quierre decir: Ta queda cerca si Jehova con aquellos quien ta reza con ele. El rezo amo un aspeto de adoranza y ta dale este mira que tiene kita hondo respeto con Dios.

•  Si cosa tu puede hace: Reza pirmi con Dios. (1 Tesalonica 5:17) Habla con ele el de tuyu maga lingasa y si cosa tu ta sinti.—Salmo 62:8. c

 Cultiva fe con Dios

•  Si cosa ta habla el Biblia: “Si noay fe, noay quien ya puede hace el cosa quiere el Dios.”—Maga Hebreo 11:6.

•  Si cosa quierre decir: Para queda cerca con Dios, debe kita tene fe con ele. Na Biblia, si tiene fe el un persona, gendeh este quierre decir que ta creé lang le que ta existi el Dios. Sino, ta confia tambien gayot ele con Dios incluido con el De Suyu maga promesa y principio. Importante el confianza na uno y otro para tene buen relacion.

•  Si cosa tu puede hace: El deverasan fe base na saber. (Roma 10:17) Poreso, estudia con el Biblia para queda tu mismo convincido que puede tu confia con Dios y con el de suyu maga consejo. El maga Testigo de Jehova alegre estudia el Biblia junto contigo. d

 Hace si cosa ta hace alegre con Dios

•  Si cosa el Biblia ta habla: “Cay ama con el Dios quiere decir obedece su maga mandamiento.”—1 San Juan 5:3.

•  Si cosa quierre decir: Cerca si Jehova con aquellos quien ta dale mira el diila amor con ele y ta hace el todo para obedece con el de suyu maga mandamiento.

•  Si cosa tu puede hace: Mientras ta estudia tu con el Biblia, nota si cosa quierre y no quierre el Dios. Pregunta na de tuyu mismo cuerpo, ‘Cosa maga cambio yo puede hace para puede hace alegre con el de mio Creador?’—1 Tesalonica 4:1.

 Aplica con el consejo del Dios para experiencia con el de suyu ayuda contigo

•  Si cosa el Biblia ta habla: “Por medio na experiencia, hay mira tu que bueno el [Dios].”—Salmo 34:8, The Bible in Basic English.

•  Si cosa quierre decir: Ta invita el Dios contigo que mira tu mismo si paquemodo le de bueno. Si experiencia tu el de suyu amor y ayuda contigo, motiva se contigo para queda cerca con ele.

•  Si cosa tu puede hace: Mientras ta le tu con el Biblia, aplica con el consejo del Dios y si hace tu se, hay beneficia gayot tu. (Isaias 48:17, 18) Considera tambien con el maga ejemplo del maga individual quien, na ayuda del Dios, ya puede enfrenta con el maga dificultad, ya queda enbuenamente el vida y el vida del diila maga familia, y ya puede incuntra deverasan alegria. e

 Gendeh justo idea: Gendeh kita puede conoce con Dios cay un misterio le.

 Verdad: Tiene cuanto maga cosas acerca con Dios que dificil kita para entende, igual como ya habla el Biblia que un Espiritu le. Pero, puede siempre kita conoce con Dios. Gane, el Biblia ta habla que debe kita conoce con ele para puede kita obtene vida eterna. (Juan 17:3) Ta usa el Biblia maga termino que puede kita entende para habla kanaton acerca na diaton Creador, para revela con el de suyu personalidad, el de suyu proposito na maga gente y na tierra, y el de suyu maga principio. (Isaias 45:18, 19; 1 Timoteo 2:4) Y como cosa ya menciona enante, ta revela tambien el Biblia con el nombre del Dios. (Salmo 83:18) Entonces, gendeh lang kita puede conoce con Dios sino puede tambien kita queda cerca con ele.—Santiago 4:8.