Manada gente ta pensa que imposible sabe si quien gayot ya escribi con el Biblia. Pero, el Biblia ta hace claro si quien gayot ya escribi con este. El cuanto libro del Biblia ta principia na este maga frase: “el maga palabra de Nehemias,” “el vision que ya mira si Isaias” y “el palabra de Jehova que ya ricibi si Joel.”—Nehemias 1:1; Isaias 1:1; Joel 1:1.

 Mayoria del maga escritor del Biblia ya admiti que ya escribi sila por medio na guia de Jehova, el unico y verdadero Dios. El maga profeta quien ya escribi con el Hebreo Escritura ya proclama mas de 300 beses: “Este el cosa ya habla si Jehova.” (Amos 1:3; Miqueas 2:3; Nahum 1:12) El otro escritor ya ricibi el mensaje del Dios por medio del maga angel.—Zacarias 1:7, 9.

 Maga 40 gente el ya escribi con el Biblia adentro de 1,600 año. El cuanto ya puede escribi mas de un libro del Biblia. Gane, igual el Biblia na un diutay library que tiene 66 libro. Tiene este 39 libro de Hebreo Escritura que ta llama el manada como Daan Testamento y 27 libro de Cristiano Griego Escritura que ta llama tambien el otro como el Nuevo Testamento.