El infierno (“Sheol” y “Hades” na maga original lengguaje del Biblia) amo el sepultura y gendeh un lugar donde ta quema para castiga con el maga gente. Quien el guinda na infierno? El maga bueno y malo. (Job 14:13; Salmo 9:17) El Biblia ta habla que este sepultura amo el “casa donde anda el todo vivo.”​—Job 30:23.

 Maskin si Jesus ya guinda na infierno cuando ya muri le. Pero, “noay [con ele] abandona na impierno” cay ya resucita con ele el Dios.​—Act. 2:31, 32, El Nuevo Testamento na Chavacano.

El infierno ba hasta para cuando?

 El todo aquellos quien na infierno hay sale. Resucita kanila si Jesus por medio na poder del Dios. (Juan 5:28, 29; Maga Actividad 24:15) Acerca na resureccion na futuro, el profecia na Revelacion 20:13 ya habla que “el muerte y el lugar del maga muerto ya manda sale afuera con todo el maga muerto que ta guarda sila.” Si nuay mas ya laman el infierno, gendeh mas este existi. Nuay mas ya quien anda alla cay “nunca mas ay tene muerte.”​—Revelacion 21:3, 4; 20:14.

 Pero, gendeh todo quien ta muri ta guinda na infierno. El Biblia ta dale mira que bien malo el cuanto gente y gendeh mas sila cambia. (Maga Hebreo 10:26, 27) Si muri sila, gendeh sila guinda na infierno sino na Gehena​—simbolo del destrozo que nuay mas esperanza vivi otravez. (Mateo 5:29, 30) Por ejemplo, ya dale mira si Jesus que el cuanto hipocrito religioso lider na de suyu tiempo hay guinda na Gehena.​—Mateo 23:27-33.