Si Juan Bautista amo un profeta del Dios. (Lucas 1:76) Ya nace le nuay dura antes nace si Jesus y ya muri le del 32 C.E. Ya manda el Dios con ele que prepara con el maga gente para na llegada del Mesias o Cristo. Ya hace este si Juan cuando ya predica le el mensaje del Dios na maga igual con ele Judio para bira sila con Dios.—Marcos 1:1-4; Lucas 1:13, 16, 17.

 El mensaje de Juan ya puede ayuda con el maga sincero individual para identifica con Jesus de Nazaret como el Mesias. (Mateo 11:10) Ya anima si Juan con el maga gente para arripinti na diila maga culpa y despues dale mira con ese por medio na bautismo. (Lucas 3:3-6) Manada gente le ya bautiza poreso ya llama con ele Juan Bautista. El de con todo importante persona que ya bautiza le amo si Jesus. a—Marcos 1:9.

Na este articulo

•  Porque diferente si Juan Bautista?

•  Quien el mayores de Juan Bautista?

•  Quien ya causa con el muerte de Juan Bautista?

•  Yan competencia ba si Juan Bautista y Jesus?

•  Cuanto maga hombre na Biblia el tiene nombre Juan?

 Ya predicta ya si cosa le hace: Por medio na de suyu trabajo predicacion, ya cumpli si Juan con el profecia acerca na mensajero de Jehova. (Malaquias 3:1; Mateo 3:1-3) Ya dale le mira que ele el quien “ay prepara . . . con el maga gente.” Ya ayuda le con el maga igual con ele Judio que acepta con el mensaje de Jesucristo, el representante de Dios Jehova.—Lucas 1:17, El Nuevo Testamento na Chavacano.

 Cosas que ya puede le hace na de suyu vida: Ya habla si Jesus que “noay pa quien ya nace na mundo quien mas importante pa con Juan el Bautista. Pero el mas menos na Reino del Cielo, mas importante pa que con ele.” (Mateo 11:11) Gendeh lang un profeta si Juan sino un “mensajero” tambien le poreso nuay siervo del Dios que ya vivi antes con ele el puede considera que mas importante contra con ele. Ta dale tambien mira el maga palabra de Jesus que si Juan gendeh hay queda rey na Reino del Dios na cielo. b Ya muri este fiel profeta antes hace posible el Cristo que vivi el cuanto na cielo. (Maga Hebreo 10:19, 20) Poreso, el esperanza de Juan amo que vivi hasta para cuando bajo na Reino del Dios na Paraiso tierra.—Salmo 37:29; Lucas 23:43.

 El maga mayores de Juan amo el man maridable que si Zacarias y Elisabet. Si Zacarias amo un Judio sacerdote. Baug si Elisabet y gendeh ta puede tene anak poreso un milagro quel cuando ya nace si Juan. Mas pa, igual sila de Zacarias que de edad ya.—Lucas 1:5-7, 13.

 Ya manda si Rey Herodes Antipas que curta con el cabeza de Juan. Ya hace le se cay amo se el cosa quierre el de suyu mujer que si Herodias. Rabiao si Herodias con Juan cay ya habla este con Herodes que ilegal el diila matrimonio bajo na ley de maga Judio.—Mateo 14:1-12; Marcos 6:16-19.

 Nuay habla el Biblia que tan competencia sila. (Juan 3:25-30) Gane, ya habla si Juan que responsibilidad de suyu que prepara con el maga gente para acepta con el Mesias y gendeh para man competencia con ele. Ya habla le: “Ya vene yo para bautiza con agua y ansina manda con el maga gente de Israel conoce con Ele.” Despues ya omenta le: “Ele amo gayot el Anak del Dios.” (Juan 1:26-34) Poreso bien alegre si Juan cuando ya oi le que ta tiene buen exito el ministerio de Jesus.