Mas mucho, ta usa con el expresion “Buen Samaritano” para refiri con el un persona quien ta ayuda con aquellos quien ta necesita. Ese termino estaba na un istoria que ya menciona si Jesus para dale mira que el un buen vecinos ta ayuda con otro maskin cosa pa man el diila nacionalidad o background.

Na este articulo

•  Cosa el istoria acerca na “Buen Samaritano”?

•  Porque ya menciona si Jesus acerca na este istoria?

•  Cosa el leccion de este istoria?

•  Quien el maga Samaritano?

•  Ya sucede ba gayot el istoria acerca na “Buen Samaritano”?

Este el sumario del istoria que ya menciona si Jesus: Un Judio el tan viaje estaba na Jerusalem para anda na Jerico. Mientras talli le na camino, ya ruba con ele, ya gulpia y cerca ya le muri.

Ya pasa el un Judio sacerdote y despues ya pasa tambien el un Judio religioso lider. Maskin pa igual el diila nacionalidad na aquel hombre, nuay sila ayuda con ele.

Na uliji, un hombre que de otro nacion el ya pasa alla. Un Samaritano le. (Lucas 10:33; 17:16-18) Por causa cay ya tiene lastima el Samaritano con aquel hombre, ya cura le con el maga irida de este. Despues, ya lleva le con este na un inn o un casa que puede man renta. Alla ya cuida le con este entero noche. Pagka-alamañana, ya paga le con el quien encargao para cuida con este hombre y ya promete que hay paga le con el maskin cosa omento gasto.—Lucas 10:30-35.

Ya menciona este si Jesus con el un hombre quien ta pensa que el de suyu vecinos amo aquellos lang igual na de suyu nacionalidad y religion. Quierre enseña si Jesus con este hombre un importante leccion—que el de suyu “vecinos” gendeh lang ta inclui con aquellos quien igual con ele Judio. (Lucas 10:36, 37) Este istoria ya inclui na Biblia para enseña con todo quien quierre hace alegre con Dios.—2 Timoteo 3:16, 17.

Este istoria ta enseña que el un buen vecinos ta demonstra lastima por medio na de suyu accion. Ta ayuda le con el un gente quien ta sufri maskin cosa pa el de suyu background, raza o nacionalidad. El un buen vecinos ta trata con otro na manera que quierre le que trata con ele.—Mateo 7:12.

De antes, ta queda el maga Samaritano na un lugar na norte del Judea. El cuanto kanila amo maga descendiente de maga Judio quien ya casa na maga gendeh Judio.

Del primer siglo C.E., el maga Samaritano ya tiene diila mismo religion. Ya acepta sila con el primer cinco libro del Hebreo Escritura pero mas mucho gendeh sila ta acepta con el otro libro de este.

Na tiempo de Jesus, bajo el mirada del manada Judio na maga Samaritano y ta evita sila kanila. (Juan 4:9) El cuanto Judio ta usa con el termino “Samaritano” como insulto.—Juan 8:48.

Nuay menciona na Biblia si ya sucede ba gayot el istoria acerca na Samaritano. Pero si ta enseña si Jesus, ta usa le maga tradicion y lugar que familiar con aquellos quien ta oi con ele para facil sila entende con el leccion que quierre le enseña.

Justo el manada detalle de este istoria. Por ejemplo:

• Mas de 20 kilometro el camino estaba na Jerusalem para na Jerico—pa-abajada este maga un kilometro. Justo el istoria cuando ya habla este que ta abaja el maga gente estaba na Jerusalem para na Jerico.—Lucas 10:30.

• El maga sacerdote y Levita quien ta queda na Jerico regular ta pasa na ese camino si ta anda na Jerusalem.

• Manada maga ladron el ta esconde na ese camino y ta espera con quien sila hace victima—especialmente con aquellos quien solo-solo ta viaja.