Talli Ba Contigo na Corazon el Reino del Dios?
El contestacion del Biblia
Nuay. El Reino del Dios gendeh lang un cosa que talli na corazon del maga Cristiano. a El Biblia ya dale mira si onde gayot con este puede incuntra cuando ya llama con este “el Reino del Cielo.” (Mateo 4:17, El Nuevo Testamento na Chavacano) Considera si paquemodo el Biblia ya dale mira que el Reino del Dios amo un deverasan gobierno que ta rula na cielo.
Na gobierno del Dios, tiene maga quien ta rula, maga viviente que bajo con ese y maga ley. Tiene tambien se autoridad para establicia con el voluntad del Dios na cielo y na tierra.—Mateo 6:10; Revelacion 5:10.
El gobierno o Reino del Dios hay rula con el todo “maga gente de diferente maga nacion y lengguaje” aqui na tierra. (Daniel 7:13, 14) El quien ya iscuji con el quien hay rula gendeh el maga gente, sino el Dios mismo.—Salmo 2:4-6; Isaias 9:7.
Si Jesus ya habla con el de suyu maga fiel apostoles que ‘sinta sila na maga trono’ junto con ele na Reino na cielo.—Lucas 22:28, 30.
El Reino tiene maga enemigo con quien hay destroza.—Salmo 2:1, 2, 8, 9; 110:1, 2; 1 Corinto 15:25, 26.
El Biblia gendeh ta enseña que el Reino ta rula na corazon del un persona. Pero, este ta dale mira que el “palabra del Reino” o el “buen noticia acerca del Reino” debe afecta con el diaton maga corazon.—Mateo 13:19; 24:14.
Cosa quierre decir que “el reino del Dios talli con ustedes”?
El cuanto maga gente tan libug si onde el Reino por causa na manera que yan translate con el Lucas 17:21 na cuanto maga version del Biblia. Por ejemplo, el King James Version ya habla que “el reino del Dios talli con ustedes.” Para puede kita enbuenamente entende con este versiculo, debe kita considera con el contexto.
El Reino del Dios nuay na corazon del maga gente quien tan contra con Jesus
Si Jesus ta converza con el maga Fariseo, un grupo del maga lider de religion que tan contra con ele y envuelto na plano que mata con ele. (Mateo 12:14; Lucas 17:20) Justo ba para pensa que el reino talla adentro na diila mal corazon? Si Jesus ya habla kanila: “Adentro lleno ustedes de ipocresia pati maldad.”—Mateo 23:27, 28.
El otro maga version del Biblia exacto ya man translate con el cosa ya habla si Jesus na Lucas 17:21: “El Reino de Dios taqui ya entre con ustedes.” (Diamon el italic; El Nuevo Testamento na Chavacano) “El Reino del Dios taqui junto con ustedes.” (Diamon el italic; Contemporary English Version) El Reino del cielo “junto” o “entre” na maga Fariseo cay si Jesus, con quien el Dios ya iscuji para rula como Rey, talla junto kanila.—Lucas 1:32, 33.
a Mucho maga Cristiano religion ta enseña que el Reino del Dios talli na un persona o talli na de suyu corazon. Por ejemplo, na United States, el Southern Baptist Convention ya habla que parte del Reino del Dios amo “el rulanza del Dios na corazon y na vida del cada individual.” Semejante se na cosa ya habla si Pope Benedict XVI na de suyu libro Jesus of Nazareth, que “el Reino del Dios hay llega si el corazon ta oi” o ta acepta con Jesus.
Baka Gusta Tambien Tu
ESSENTIAL BIBLE TEACHINGS
Cosa el Reino del Dios?
Durante el de suyu ministerio, manada beses ya enseña si Jesus acerca na Reino del Dios. Por cuanto siglo, el maga gente ta reza que ojala llega ya ese Reino.
CONTESTACION NA MAGA PREGUNTA ACERCA NA BIBLIA
Cosa Hace el Reino del Dios?
Sabe si cosa sucede si el gobierno del Dios hay rula na entero mundo.
ESPECIAL CAMPAÑA
Pruba con el Libre Estudiada
Pruba con el diamon libre estudiada de Biblia junto con el un Testigo de Jehova.