El peligroso grande animal con siete cabeza que ya introduci na Revelacion 13:1, ta representa con el sistema de politica na entero mundo.

•   Tiene este autoridad, poder y trono que ta dale mira que un organizacion de politica este.​—Revelacion 13:2.

•   Ta rula este na “todo el maga raza, maga pais, maga lenguaje y maga nacion.” Poreso, mas pa este na gobierno na un nacion.​—Revelacion 13:7, El Nuevo Testamento na Chavacano.

•   Combinacion este del cuatro animal que ya menciona na profecia na Daniel 7:2-8, incluido el forma de un leopardo, pies de un oso, boca de leon y diez cuerno. El maga animal na profecia de Daniel ta refiri con el especifico maga rey o politica de reino que sunod-sunod ya rula na maga imperio. (Daniel 7:17, 23) Poreso, el peligroso grande animal na Revelacion capitulo 13 ta representa na un combinacion de organizacion de politica.

•   Este “ta sale na mar,” quierre decir que el tuburan del maga gobierno del gente amo el trambulicao grupo del gente que tan contra con Dios.​—Revelacion 13:1; Isaias 17:12, 13.

•   El Biblia ta habla que el numero o nombre del animal​—666—​“ta representa el nombre de un persona.” (Revelacion 13:17, 18) Ese expresion ta indica que el animal na Revelacion capitulo 13 amo un organizacion del gente y gendeh un espiritu o demonio.

 Maskin pa posible gendeh pirmi tan uyun el maga nacion, unido sila na diila determinacion que mentena con el diila autoridad en vez somete na rulanza del Reino del Dios. (Salmo 2:2) Man junto tambien sila para man guerra contra con el maga soldao del Dios que ta encabeza si Jesucristo na Armagedon. Pero este guerra, hay resulta na destrozo del maga nacion.​—Revelacion 16:14, 16; 19:19, 20.

“Siete cabeza y dies maga cuerno”

 El cuanto maga numero na Biblia ta usa como simbolico. Por ejemplo, el diez y siete ta representa na pagka-completo. El manera para puede entende si cosa el especifico quierre decir del “siete cabeza y dies maga cuerno” del animal na Revelacion capitulo 13 amo “el rebulto del primero Grande Animal” que uliji ya menciona na Revelacion​—un colorao brillante animal con siete cabeza y diez cuerno. (Revelacion 13:1, 14, 15; 17:3) El Biblia ta habla que el siete cabeza de este colorao animal quierre decir “maga siete rey” o maga gobierno.​—Revelacion 17:9, 10.

 Na igual manera, el siete cabeza del animal na Revelacion 13:1 ta representa con el siete maga gobierno: el maga poderoso gobierno que ya domina na historia y ya persigui con el siervo del Dios​—el Egipto, Asiria, Babilonia, Medo-Persia, Grecia, Roma y Anglo-America. Si el diez cuerno ta representa con el todo independiente estado, diutay man y grande, entonces, el corona na cada cuerno, ta dale mira que ta rula tambien el cada nacion junto na poderoso gobierno na de aquel tiempo.