Si. El siguiente cuatro principio na Biblia puede ayuda contigo na maga problema na sen y debe:

1.   Plaña si cuanto gasta. “Cay si tiene de ustedes ta plania planta un torre, gendeh ba le ay sinta una y carcula el maga gastos, para sabe si tiene le bastante cen para completa el torre?” (Lucas 14:28, El Nuevo Testamento na Chavacano) No dayun cumpra un cosa por causa lang cay sale este. Prepara un budget y sigui con ese.

2.   Evita man debe na cosas que gendeh necesita. “El quien ta presta amo esclavo del quien ta dale presta.” (Proverbio 22:7) Si yan debe tu y gendeh tu ta puede dale con el pago que yan sabut ustedes, pruba converza con el quien ya dale debe contigo acerca si paquemodo tu con ese ta plaña paga. Queda determinao. Dale mira el calidad del persona que ya menciona na Proverbio 6:1-5: “Queda humilde y continua pidi con el de tuyu vecinos que tiene lastima contigo. No deja que cerra de tuyu ojos y no durmi.” Maskin pa nuay le conforma na primero, continua lang siempre pidi.

3.   Tiene justo mirada na sen. “El gente envidioso bien quierre queda rico, pero no sabe le hay queda le pobre.” (Proverbio 28:22) El envidia y pagka-hambriento puede causa gendeh lang problema na financial sino pati na espiritual.

4.   Queda contento. “Basta tiene lang kita comida y camisa, conforma ya lang kita con esos.” (1 Timoteo 6:8) El sen gendeh puede cumpra con el alegria y con el pagka-contento. El cuanto maga alegre gente na mundo amo aquellos maga simple lang el vida. El cosa sila tiene amo el amor del familia, amigo y amiga y buen relacion con Dios.​—Proverbio 15:17; 1 Pedro 5:6, 7.