Considera con el siguiente practical sugestion que base na maga principio na Biblia:

1.   Queda profesional na tratamiento con otro. Queda friendly y dale mira respeto con el de tuyu maga uban na trabajo. Pero, evita dale el impresion que aceptable lang contigo que dale sila mira sexual interes.—Mateo 10:16; Colosa 4:6.

2.   Queda modesto na mudada. Si el de tuyu camisa bien corto o ta saca el atencion del otro, posible se dale mal impresion con otro. El Biblia ta anima kanaton que “usa camisa decente y bisti na un manera humilde y modesto.”—1 Timoteo 2:9, El Nuevo Testamento na Chavacano.

3.   Iscuji amigo enbuenamente. Si man junto tu con aquellos quien ta consinti o ta permiti con otro que man flirt o hace cosas bastos kanila, mas grande el posibilidad que ansina tambien trata contigo el otro.—Proverbio 13:20.

4.   No participa na maga malicioso istoria. Sale na grupo si ta guinda ya el cuento acerca na cosas “cuchinadas o tonterias.” Incluido aqui el maga “broma pesao” o malicioso broma.—Efeso 5:4.

5.   Evita con el maga situacion que posible tu man compromiso. Por ejemplo, con cuidao si tiene quien convida contigo esta despues del hora de trabajo si nuay valido razon.—Proverbio 22:3.

6.   Man franca y no man alang-alang. Si tiene quien ta hace cosas bastos contigo, habla claro con ele que no quierre tu con el cosa le ta hace. (1 Corinto 14:9) Por ejemplo, puede tu habla: “Gendeh yo ta gusta con el cosa tu ta hace. No man pilit-que-pilit conmigo.” Puede tu escribi carta con el quien yan bastos contigo. Manda con ele sabe si cosa tu ya sinti y hace claro si cosa tu quierre que hace le. Hace claro con ele que el de tuyu decision amo base na de tuyu creencia y principio na moral.—1 Tesalonica 4:3-5.

7.   Pidi ayuda. Si ta continua el sexual harassment, avisa na un amigo o amiga que puede tu confia, na un miembro del de tuyu familia o uban na trabajo o un individual quien sabe si paquemodo ayuda con el maga victima de harassment. (Proverbio 27:9) Manada maga victima el ya puede tiene comforta por medio na rezo. Maskin nuay pa tu experiencia reza desde antes, no hace de menos con el ayuda que puede tu ricibi estaba con Jehova, “el Dios de todo clase de consuelo.”—2 Corinto 1:3.

 Por causa na sexual harassment, dificil el situacion na trabajo del millones de maga gente. Pero puede ayuda el Biblia na este problema.