Na Biblia, el palabra que yan man translate “resureccion” estaba na Griego palabra a·naʹsta·sis que quierre decir “levanta” o “para otravez.” Si resucita con el un persona, quierre decir hace con ele levanta otravez estaba na muerte y hace con ele vivi otravez como si quien le de antes.​—1 Corinto 15:12, 13.

 Maskin pa nuay menciona el palabra “resureccion” alli na Hebreo Escritura, que conocido tambien como el Daan Testamento, puede siempre kita mira alli con ese enseñanza. Por ejemplo, por medio con profeta Oseas, el Dios ya promete: “Hay salva yo kanila desde na poder de Sepultura; hay saca yo otravez kanila estaba na muerte.”​—Oseas 13:14; Job 14:13-15; Isaias 26:19; Daniel 12:2, 13.

 Onde resucita con el maga gente? Hay resucita con el cuanto maga gente na cielo para rula como maga rey junto con el Cristo. (2 Corinto 5:1; Revelacion 5:9, 10) El Biblia ya llama con este como el “primero resurreccion” y “el primer resureccion.” Este maga expresion ta dale mira que tiene pa otro resureccion hay sucede. (Revelacion 20:6, El Nuevo Testamento na Chavacano; Filipo 3:11, NWT) El ultimo resureccion amo para aqui na tierra donde hay vivi otravez el mayoria del maga gente.​—Salmo 37:29.

 Na cosa manera hay resucita con el maga gente? El Dios ya dale poder con Jesus para resucita con el maga muerto. (Juan 11:25) Hay resucita si Jesus con “todo el maga muerto . . . na diila maga sepultura” asegun na diila personalidad, custumbre y na cosas na diila memoria. (Juan 5:28, 29) Aquellos quien resucita na cielo hay queda como un espiritu persona. Mientras aquellos quien hay resucita na tierra hay tiene perfecto fisical cuerpo y buen salud.​—Isaias 33:24; 35:5, 6; 1 Corinto 15:42-44, 50.

 Con quien hay resucita? El Biblia ya habla que “el maga gente bueno y el maga pecador ay resucita.” (Maga Actividad 24:15) Incluido na maga gente bueno el maga fiel siervo del Dios igual kanda Noe, Sara y Abraham. (Genesis 6:9; Maga Hebreo 11:11; Santiago 2:21) Incluido na maga gente pecador o aquellos gendeh recto amo aquellos nuay sigui con el maga principio del Dios cay nuay sila oportunidad para aprende y sigui con ese.

 Pero, aquellos maga bien malo y nuay cambia gendeh gayot hay resucita. Si muri sila, hay destroza kanila hasta para cuando y nuay mas sila esperanza que vivi otravez.​—Mateo 23:33; Maga Hebreo 10:26, 27.

 Cuando hay sucede el resureccion? El Biblia ya predicta que el resureccion na cielo hay sucede durante na presencia del Cristo que ya principia del 1914. (1 Corinto 15:21-23) El resureccion aqui na tierra hay sucede adentro na Un Mil Año Rulanza de Jesucristo, donde queda ya paraiso el tierra.​—Lucas 23:43; Revelacion 20:6, 12, 13.

 Porque kita puede confia que tiene gayot resureccion? Detallado ya menciona el Biblia acerca el nueve resureccion que ya sucede, donde el cada uno tiene maga gente quien ya puede mira. (1 Rey 17:17-24; 2 Rey 4:32-37; 13:20, 21; Lucas 7:11-17; 8:40-56; Juan 11:38-44; Maga Actividad 9:36-42; Maga Actividad 20:7-12; 1 Corinto 15:3-6) Maka-interes gayot el resureccion de Jesus con Lazaro cay cuatro dia ya este muerto y ya hace si Jesus con el milagro adelante del manada gente. (Juan 11:39, 42) Maskin aquellos quien tan contra con Jesus nuay puede nega que ya sucede este. Poreso ya plaña sila que mata con Jesus y con Lazaro.​—Juan 11:47, 53; 12:9-11.

 Ta dale mira el Biblia que el Dios tiene el abilidad y deseo que resucita con el maga muerto. Ciendo nuay limitacion el de suyu memoria, tiene le detallado record con el cada uno persona con quien le hay resucita por medio del de suyu grande poder. (Job 37:23; Mateo 10:30; Lucas 20:37, 38) El Dios puede resucita con el maga muerto y quierre le se hace. Cuando ya menciona este acerca na resureccion, este el cosa ya habla el Biblia acerca con Dios: “Hay desea gayot tu con el trabajo del de tuyu mano.”​—Job 14:15.

Maga gendeh justo idea acerca na resureccion

 Falso: Durante el resureccion, hace bira con el alma na cuerpo.

 Verdad: El Biblia ta enseña que el alma amo el mismo persona y gendeh el un cosa que ta continua vivi despues del muerte. (Genesis 2:7, footnote; Ezequiel 18:4) Durante el resureccion, gendeh ta hace bira otravez con el alma na cuerpo del un persona sino ta crea con ele otravez como un vivo alma.

 Falso: Hay resucita con el cuanto gente y destroza kanila dayun.

 Verdad: El Biblia ta habla que “aquellos quien ya hace malo ay levanta y ay queda condenao.” (Juan 5:29) Pero, gendeh kanila condena base na cosa sila ya hace de antes sino base na cosa sila hace despues kanila resucita. Si Jesus ya habla: “El maga muerto ay oi el voz del Anak del Dios y aquellos quien ta oi ese voz ay vivi.” (Juan 5:25) El nombre de aquellos quien ‘ta oi’ o ta obedece con el maga cosas sila ya aprende despues kanila resucita hay escribi na “libro del vida.”​—Revelacion 20:12, 13.

 Falso: Si resucita con el persona, hay ricibi le con el de suyu cuerpo que ya tiene le antes le muri.

 Verdad: Si muri el un persona, el de suyu cuerpo hay man buluk y bira otravez na polvos.​—Eclesiastes 3:19, 20.