Acerca na maga muerto, el Biblia ta habla: “Ya perde ya tambien el diila amor, rabia y el diila selos . . . El cosa que puede tu hace, hace con todo fuerza cay nuay mas trabajo ni plano ni saber ni sabeduria na Sepultura onde tu hay guinda.” (Eclesiastes 9:6, 10; Salmo 146:4) Entonces, el muerto no puede ya pensa, move o sinti maskin cosa. Poreso, si muri kita, gendeh ya kita ta existi.

“Na polvos tu hay bira”

 Ya habla el Dios si cosa el condicion del maga muerto cuando yan cuento le con el primer hombre, si Adan. Cay desobediente si Adan, el Dios ya habla con ele: “Polvos tu y na polvos tu hay bira.” (Genesis 3:19) Antes crea el Dios con Adan “estaba na polvos del tierra,” gendeh ta existi si Adan. (Genesis 2:7) Poreso, cuando ya muri si Adan, ya bira le na polvos y nuay mas ya existi.

 Ansina tambien ta sucede con aquellos quien ta muri ahora. Si acerca na gente y animal, el Biblia ta habla: “Estaba sila todo na polvos y bira sila todo na polvos.”​—Eclesiastes 3:19, 20.

El muerte gendeh el fin del todo cosas

 Ta compara pirmi el Biblia con el muerto na un gente durmido. (Salmo 13:3; Juan 11:11-14; Maga Actividad 7:60) El un gente que bien durmido, no sabe si cosa ta sucede na de suyu alrededor. Ansina tambien el muerto. Pero, el Biblia ta enseña que el Dios puede hace dispierta con el muerto igual como na durmido y dale kanila vida otravez. (Job 14:13-15) Para con aquellos quien resucita el Dios, el muerte gendeh el fin del todo cosas.