El Rezo del Señor ta ayuda kanaton para sabe si paquemodo kita debe reza y si cosa kita debe habla si ta reza. Ya menciona si Jesus con este rezo cuando ya habla el de suyu maga dicipulo: “Maestro, insiña canamon reza.” (Lucas 11:1, El Nuevo Testamento na Chavacano) Pero, el Rezo del Señor o el Padre Nuestro gendeh lang amo el solamente rezo que aceptable con Dios. a Sino, ya enseña este si Jesus como un ejemplo si cosa maga rezo el ta oi el Dios.

Na este articulo

•  Cosa ta habla na Rezo del Señor?

•  Cosa quierre decir del Rezo del Señor?

•  Debe ba repiti con el Rezo del Señor para reza?

•  Paquemodo kita debe reza?

•  El otro maga rezo na Biblia

 Na diferente maga translation del Biblia, diferente el maga palabra que ya usa na Rezo del Señor que puede le na Mateo 6:9-13. Este el dos ejemplo.

 Nuevo Testamento na Chavacano: “Tata diamon na cielo, dale gloria con el de Uste Nombre. Manda vene el de Uste Reino. Hace el de Uste voluntad aqui na mundo igual como alli na cielo. Dale canamon este dia el comida que necesita came. Perdona el diamon maga debe igual como ta perdona came con aquellos tiene debe canamon. No deja canamon cai na tentacion, sino libra canamon del mal.”

 El Nuevo Testamento: “Di amon Padre na cielo, ta dale came honor con el di uste nombre sagrao, y ta roga came que uste ay vene para reina canamon. Ojala que todo el maga gente ay hace el di uste querer aqui na mundo igual como todo aquellos ta hace na cielo. Todo el dia, dale canamon el comida ta necesita came, y perdona el di amon maga pecado, como ta perdona tamen came con todo quien ta hace malo canamon. Y no deja canamon cae na tentacion, y proteje canamon na poder di Satanas.” b

 El enseñanza de Jesus harmonia na otro maga enseñanza na Escritura. Poreso, puede kita expecta que el otro parte del Biblia puede ayuda kanaton para entende si cosa quierre decir del rezo del Señor.

“Tata diamon na cielo”

 Propio lang que refiri con Dios como el diaton “Tata” cay ele el ya crea y ya dale vida kanaton.—Isaias 64:8.

“Dale gloria con el de Uste Nombre”

 Debe honra y trata como sagrao con el nombre del Dios, Jehova. Ta ayuda el maga gente que sanctifica con el nombre del Dios si ta menciona sila con otro el de suyu maga calidad y maga proposito.—Salmo 83:18; Isaias 6:3.

“Manda vene el de Uste Reino”

 El Reino del Dios amo un gobierno na cielo donde el Rey amo si Jesus. Ya enseña kanaton si Jesus que reza para pidi que rula este gobierno na entero tierra.—Daniel 2:44; Revelacion 11:15.

“Hace el de Uste voluntad aqui na mundo igual como alli na cielo”

 Nuay maldad o muerte na cielo. Na igual manera, el voluntad del Dios para na tierra amo que vivi el maga gente hasta para cuando con paz y seguridad.—Salmo 37:11, 29.

“Dale canamon este dia el comida que necesita came”

 Debe kita acorda que ta depende kita con el diaton Creador para dale kanaton el comida y otro pa maga cosas que necesita kita para vivi.—Maga Actividad 17:24, 25.

“Perdona el diamon maga debe igual como ta perdona came con aquellos tiene debe canamon”

 Na este contexto, el palabra “debe” ta refiri na culpa. (Lucas 11:4) Ta culpa el todo maga gente y necesita perdon. Pero si quierre kita que perdona kanaton el Dios, debe conforme kita perdona con otro na diila maga culpa kanaton.—Mateo 6:14, 15.

“No deja canamon cai na tentacion, sino libra canamon del mal”

 Nunca ta tenta kanaton si Dios Jehova para hace maga mal cosas. (Santiago 1:13) Pero ta tenta kanaton si Satanas Diablo con quien ya llama tambien como “el tentador.” (Mateo 4:1-4; 1 San Juan 5:19) Ta pidi kita con Jehova que ayuda kanaton que resisti con el tentacion que hace cosas malo.

 Ya dale si Jesus con el Rezo del Señor como un ejemplo de rezo. Gendeh debe repiti con el cada palabra de este rezo. Antes dale si Jesus con el Rezo del Señor, ele ya habla: “Si ta reza ustedes, no repiti que repiti.” (Mateo 6:7, El Nuevo Testamento) Na otro ocasion, cuando ya dale si Jesus un ejemplo si paquemodo reza, ya usa le diferente maga palabra.—Lucas 11:2-4.

 El de con todo buen manera para reza amo si sincero kita habla con Dios si cosa kita ta pensa y ta sinti.—Salmo 62:8.

 El Rezo del Señor ta dale kanaton un buen ejemplo si paquemodo reza na manera que ta oi el Dios. Nota si paquemodo se harmonia na otro maga texto na Biblia acerca na rezo.

•   Con Dios lang reza

   Texto: “Si tiene ustedes necesidad, manda sabe con ese con el Dios por medio del de ustedes maga rezo y peticion junto con maga dalida de gracias.”—Filipo 4:6.

   Si cosa quierre decir: Con Dios kita debe reza, gendeh con Jesus, Maria o con el maga santo. El maga palabra “Tata diamon” na Rezo del Señor ta enseña kanaton que reza solamente con Dios Jehova.

•   Reza para na maga cosas que uyun na voluntad del Dios

   Texto: “Maskin cosa ta pidi kita con Ele comforme na su querer, Ele ay oi canaton.”—1 San Juan 5:14.

   Si cosa quierre decir: Puede kita reza acerca na maskin cosa que uyun na voluntad del Dios. Ya enseña kanaton si Jesus si paquemodo de importante el voluntad del Dios cuando ya inclui le na Rezo del Señor el maga palabra “hace el de Uste voluntad.” Puede kita aprende acerca si cosa el voluntad del Dios para na tierra y para na maga gente si estudia kita con el Biblia.

•   Reza acerca na maga personal cosas

   Texto: “Buta el de tuyu pesades con Jehova y ele hay ayuda contigo.”—Salmo 55:22.

   Si cosa quierre decir: Quierre el Dios que habla kita el diaton maga lingasa con ele. Igual si paquemodo ya inclui si Jesus maga personal cosas na Rezo del Señor, puede kita reza para pidi el diaton fisical necesidad cada dia, pidi guia si ta hace maga importante decision, pidi ayuda si tiene maga problema y pidi perdon para na diaton maga culpa. c