Si. Tiene valor con Dios el maga siervo de suyu quien tiene enfermedad. Acerca na un fiel siervo, el Biblia ya habla: “Hace con ele fuerte si Jehova na tiempo que enfermo le y no puede levanta na cama.” (Salmo 41:3) Si tiene tu grabe enfermedad, puede contigo ayuda si hace tu el siguiente:

1.   Pidi na rezo el fuerza para aguanta. Puede tu obtene “el paz del Dios” y ese puede ayuda contigo para aguanta y gendeh sobra man lingasa.​—Filipo 4:6, 7, El Nuevo Testamento na Chavacano.

2.   Queda positivo. El Biblia ta habla: “Si alegre tu, continua tu tiene buen salud. Hinay-hinay tu muri si pirmi tu triste.” (Proverbio 17:22, Good News Translation) Man broma-broma tambien cay puede se ayuda si triste tu y bueno se para na de tuyu salud.

3.   Hace fuerte con el de tuyu esperanza na maga promesa del Dios. El deverasan esperanza puede ayuda contigo queda alegre maskin tiene tu grabe enfermedad. (Roma 12:12) El Biblia ya habla que llega el tiempo “nuay residente quien hay habla: ‘Enfermo yo.’” (Isaias 33:24) El Dios hay cura con el maga grabe enfermedad que el ciencia gendeh ta puede incuntra el cura ahora. Por ejemplo, el Biblia ta dale mira que el maga de edad hay queda otravez joven con buen salud. El Job 33:25 ta habla: “El de suyu laman queda mas fresco contra del joven; bira otravez el de suyu fuerza igual cuando joven le.”

 Nota: Maskin ta creé kame que ta dale ayuda el Dios, el maga Testigo de Jehova quien tiene grabe enfermedad ta anda siempre chequia na doctor y ta acepta curada medical. (Marcos 2:17) Pero gendeh kame ta recomenda maskin cosa especifico clase de cura; el cada individual debe hace de suyu decision acerca con ese.