Si. Puede kanaton ayuda el Biblia para gendeh mas kita sobra man conciencia. (Salmo 32:1-5) Si ya puede kita hace mal cosas pero deverasan kita ya arripinti, el Dios hay perdona kanaton y ayuda kanaton para tene otravez paz na pensamiento. (Salmo 86:5) El Biblia ta dale mira que tiene vez, tiene beneficio si tan conciencia kita. Puede se manda move kanaton para corecta con el diaton maga kamali y mas pricura evita hace con ese na futuro. (Salmo 51:17; Proverbio 14:9) Pero, ta habla tambien el Biblia que gendeh bueno si sobra kita tan conciencia—baka ta pensa kita que nuay mas kita esperanza o nuay mas valor na mirada del Dios. Si ansina el diaton mirada na diaton mismo cuerpo, baka hay “sumi [kita] por demas na tristeza.”—2 Corinto 2:7, El Nuevo Testamento na Chavacano.

•  Porque kita tan conciencia?

•  Cosa yo puede hace si tan conciencia yo?

•  Maga texto na Biblia acerca na conciencia y perdon

 Tiene cuanto razon si porque kita tan conciencia. Baka ya puede kita hace sinti duele con el un persona con quien kita ta ama o gaha nuay kita puede hace con el un cosa que debe kita hace. Tiene vez, tan conciencia kita maskin gendeh man gayot kita debe man conciencia. Por ejemplo, baka bien alto el cosa kita ta expecta na diaton mismo cuerpo y si gendeh kita ta puede alcanza con ese, tan conciencia kita. Amo se el razon si porque el Biblia ta anima kanaton que queda razonable na cosa kita ta expecta na diaton mismo cuerpo.—Eclesiastes 7:16.

 En vez queda sobra de triste, tiene tu cosa puede hace para corecta con el de tuyu kamali. Cosa se?

•   Admiti con el de tuyu maga kamali. Reza con Dios Jehova a y pidi con el de suyu perdon. (Salmo 38:18; Lucas 11:4) Si deverasan tu ta arripinti y ta pricura que gendeh hace otravez con el kamali, asigurao hay oi contigo el Dios. (2 Cronicas 33:13; Salmo 34:18) Ta puede le mira si cosa el na diaton corazon maskin gendeh con ese ta puede mira el maga gente. Si ta puede le mira que ta pricura kita evita con el mal conducta, “fiel y justo el Dios para perdona el diaton maga pecado.”—1 San Juan 1:9; Proverbio 28:13.

   Siempre si ya puede tu hace sinti duele con otro, necesita tu acepta con ese y sincero pidi perdon con el persona. Posible gendeh se facil para hace. Necesita tu tene coraje y humildad. Pero si con todo corazon tu pidi perdon, tiene este dos importante beneficio: Gendeh mas tu man conciencia y hay tene ustedes paz.—Mateo 3:8; 5:23, 24.

•   Medita con el maga texto acerca na lastima del Dios. Por ejemplo, considera con el 1 San Juan 3:19, 20. Ta admiti na ese texto que tiene vez, “el diaton conciencia hay acusa canaton”—quierre decir posible kita queda bien critical na diaton mismo cuerpo y baka sinti kita que gendeh kita conviene ricibi el amor del Dios. Pero, ta habla tambien este que “el Dios alto pa con el diaton conciencia.” Na cosa manera? Sabe le el todo acerca kanaton y ta entende gayot le el diaton sentido y maga inclinacion. Sabe tambien le que ya nace kita imperfecto y tiene inclinacion que hace si cosa gendeh justo. b (Salmo 51:5) Poreso, ta perdona le con aquellos quien deverasan ta arripinti.—Salmo 32:5.

•   No man focus na de tuyu maga kamali de antes. El Biblia tiene manada istoria acerca na maga hombre y mujer quien ya puede hace maga kamali pero ya cambia na uliji. El uno kanila amo si Saul de Tarso quien ya queda conocido na uliji como si apostol Pablo. Cuando un Fariseo le, ya persigui gayot le con el maga siguidores de Jesus. (Maga Actividad 8:3; 9:1, 2, 11) Pero cuando ya aprende le que con Dios y con el Mesias o Cristo gale le tan contra, ya arripinti le, ya hace maga cambio y ya queda un buen Cristiano. Siempre ya arripinti gayot si Pablo na cosa le ya puede hace de antes. Pero nuay le man focus alla. Sabe le que grande el lastima del Dios poreso ya queda le un activo predicador y nuay le ulvida con el esperanza de vida hasta para cuando.—Filipo 3:13, 14.

 Jeremias 31:34: “Hay perdona yo con el diila kamali, y gendeh mas yo acorda con el diila pecado.”

 Si cosa quierre decir: Si ya perdona ya kanaton el Dios, completamente ya le hay ulvida con el diaton maga kamali. Sincero el lastima que ta dale le mira.