Nuay cay harmonia el entero Biblia. Maskin dol tan contra el cuanto texto na Biblia, puede entende si cosa este exacto quierre decir si aplica con el uno o cuanto na siguiente maga principio:

1.   Considera con el contexto. Maskin cosa man habla el un autor, posible que entende el otro que dol tan contra este si gendeh considera con el contexto del cosa le ta habla.

2.   Considera con el punto de vista del escritor. El maga quien ya mira con el un suceso posible habla exacto cosas acerca con ese maskin gendeh sila ta usa igual maga palabra o inclui igual maga detalle.

3.   Considera con el maga detalle acerca na historia y comon practica.

4.   Sabe si ya usa con el palabra na figurativo o na literal manera.

5.   Acorda que el un accion posible para na un persona maskin gendeh ele mismo el quien ya hace con este. a

6.   Usa un exacto translation de Biblia.

7.   No pricura hace uyun con el cosa ta habla el Biblia na maga gendeh justo religioso idea o doctrina.

 El siguiente maga ejemplo ta dale mira si paquemodo este maga principio ta explica si porque dol gendeh tan uyun el cuanto texto na Biblia.

Principio 1: Contexto

  Si ya descanza el Dios na ika-siete dia, porque ta habla el Biblia que ya continua le trabaja? El contexto na Genesis acerca na creacion ta dale mira que cuando ya habla que el Dios “ya principia descanza na ika-siete dia desde na todo maga trabajo que ta hace le,” ta refiri este na especifico trabajo de creacion del tierra. (Genesis 2:2-4) Nuay man contra si Jesus con este cuando ya habla le que el Dios “ta continua siempre trabaja” cay tan cuento le acerca na otro maga trabajo del Dios. (San Juan 5:17, El Nuevo Testamento) Incluido na maga trabajo del Dios amo que guia con el maga escritor para escribi con el Biblia y cuida con el maga gente.​—Salmo 20:6; 105:5; 2 Pedro 1:21.

Principio 2 y 3: Punto de vista y historia

  Onde si Jesus ya cura con el gente bulak? El libro de Lucas ta habla que ya cura si Jesus con el un gente bulak “cuando cerca ya si Jesus na Jerico” mientras na Mateo ya menciona que tiene dos gente bulak y ese ya sucede “cuando ta sale ya sila na Jerico.” (Lucas 18:35-43; Mateo 20:29-34) Este dos texto ya escribi na diferente punto de vista y el cada uno tiene detalle que nuay menciona na otro. Si acerca na numero del gente, mas especifico ya discuti si Mateo que tiene dos hombre mientras si Lucas yan focus na un hombre con quien yan cuento si Jesus. Si acerca tambien na locacion, ya incuntra el maga archaeologist que na tiempo de Jesus tiene dos ciudad el Jerico, donde el daan ciudad de maga Judio maga uno y media kilometro (1 mi) de lejos estaba na nuevo ciudad del Roma. Posible, na entre medio si Jesus de este dos ciudad cuando ya hace le con este milagro.

Principio 4: Figurativo y literal termino

  Hay destroza ba con el tierra? El Biblia ta habla na Eclesiastes 1:4 que “el tierra hay esta hasta para cuando.” Pero para na otro, contra se na cosa ta habla el otro texto que “el mundo y todo maga cosa-cosa na mundo ay man uput.” (2 Pedro 3:10, El Nuevo Testamento na Chavacano) Na Biblia, el palabra “mundo” o tierra ta usa na literal si ta refiri na diaton planeta y figurativo si ta refiri na maga gente quien ta esta aqui. (Genesis 1:1; 11:1) El destrozo del “mundo” asegun na 2 Pedro 3:10, gendeh ta refiri na quemada del diaton planeta sino na tiempo “cuando ay destroza con todo el maga pecador.”​—2 Pedro 3:7.

Principio 5: Si con quien ta refiri

  Na Capernaum, quien ya atraca con Jesus para habla el cosa ta pidi el un Romano oficial? El Mateo 8:5, 6 ta habla que el Romano oficial (soldao oficial) mismo el ya anda con Jesus, mientras el Lucas 7:3 ta habla que ya imbia el Romano oficial maga de edad Judio hombre para habla el cosa le ta pidi. Puede con este entende que el Romano oficial el ya pidi pero ya imbia le con el maga de edad hombre como de suyu maga representante.

Principio 6: Exacto translation

  Todo ba kita ta culpa? El Biblia ta enseña que todo kita ya hereda pecado na primer gente, si Adan. (Roma 5:12) Dol contra este na otro translation del Biblia donde ta habla que el un buen gente “gendeh ta peca” o “gendeh ta culpa.” (1 San Juan 3:6, El Nuevo Testamento na Chavacano; King James Version) Pero na original lengguaje, el Griego termino para na palabra “peca” na 1 San Juan 3:6 ta refiri na accion que ta continua hace. El pecado que ya hereda kita, que gendeh kita ta puede evita, gendeh igual na intencional pecado que ta hace si ta continua kita desobedece con el maga ley del Dios. Poreso, ya hace claro el cuanto translation con este y ya usa con el frase igual na “gendeh ta continua comete pecado” o “gendeh pirmi ta comete pecado.”​—New World Translation; Phillips.

Principio 7: Base na Biblia, gendeh na doctrina

  Igual ba si Jesus con Dios o mas bajo con Dios? Si Jesus ya habla: “Mi Tata y yo uno lang” que dol tan contra na cosa le ya habla, “el Tata mas importante que conmigo.” (Juan 10:30; 14:28) Para entende con ese maga versiculo, debe kita examina si cosa gayot el Biblia ta habla acerca con Jehova y Jesus en vez de pricura hace harmonia con el maga versiculo na doctrina de Trinidad que gendeh base na Biblia. El Biblia ta dale mira que si Jehova gendeh lang Tata de Jesus sino Dios tambien le de Jesus, el Uno con quien si Jesus ta adora. (Mateo 4:10; Marcos 15:34; Juan 17:3; 20:17; 2 Corinto 1:3) Gendeh igual con Dios si Jesus.

 El contexto cuando ya habla si Jesus “mi Tata y yo uno lang” ta dale mira que tan cuento le acerca na un proposito que tiene le y de suyu Tata, si Dios Jehova. Na uliji, si Jesus ya habla: “El Tata ta esta unido conmigo y yo con el Tata.” (Juan 10:38) Si Jesus y el de suyu maga siguidores tiene tambien un proposito cay cuando ya reza le con Dios acerca kanila, ele ya habla: “Ya dale yo canila el gloria que Uste ya dale conmigo, para igual como Uste y yo unido, ansina tamen sila ay queda unido: Yo unido canila y Uste conmigo.”​—Juan 17:22, 23.