Si, el Biblia ta dale kanaton manada evidencia que tiene Dios. Ta anima ese kanaton para tiene fuerte fe con Dios y gendeh lang basta creé na maga enseñanza de religion, sino usa con el diaton “abilidad para examina” y “entendimiento.” (Roma 12:1, NWT; 1 Juan 5:20, El Nuevo Testamento) Considera con el siguiente maga razon que yan base na Biblia:

•   El diaton universo arreglao y tiene vida. Este ta dale mira que tiene Creador. El Biblia ta habla: “Todo casa tiene quien ya planta. Pero quien ya hace con el mundo amo el Dios.” (Maga Hebreo 3:4, El Nuevo Testamento na Chavacano) Maskin simple lang este razon, manada educao persona el ta creé que maka-convinci ese evidencia. a

•   Como maga gente, tiene kita el natural deseo para entende si cosa el proposito del vida. Un cosa este que ta continua kita desea maskin ya satisfecha ya con el diaton fisical necesidad. Parte este del cosa ta llama el Biblia diaton “espiritual necesidad.” Ta inclui este con el diaton deseo para conoce y adora con Dios. (Mateo 5:3, NWT; Revelacion 4:11) Este espiritual necesidad gendeh lang ta dale prueba que ta existi el Dios sino ta dale este mira que un amable Creador ele quien quierre que satisfecha kita con ese diaton necesidad.​—Mateo 4:4.

•   Exacto ya cumpli el manada detallado profecia que adelantao ya escribi na Biblia manada siglo ya el ya pasa. El pagka-exacto y detallado de ese maga profecia ta dale gayot mira que estaba ese na un persona que mas poderoso compara na gente.​—2 Pedro 1:21.

•   El maga escritor del Biblia tiene mas alto saber acerca na ciencia compara na maga gente na diila tiempo. Por ejemplo, manada gente de antes el ta creé que el tierra talli encima na un animal igual na un elefante, puerco monte o vaca. Pero, el Biblia ya habla que ya hace con el tierra que “nuay onde tan bitay.” (Job 26:7) Justo tambien el Biblia cuando ya habla este que el forma del tierra amo “redondo” o “globo.” (Isaias 40:22, footnote; Douay Version) Manada gente el ta pensa que el razon si porque mas alto el entendimiento del maga escritor del Biblia amo cay el diila informacion estaba con Dios.

•   El Biblia ta dale contestacion na manada maga pregunta que dificil para contesta. Si gendeh puede contesta con ese maga pregunta, posible que el un persona queda un atheist. Por ejemplo: Si el Dios amable y el todopoderoso, porque tiene sufrimiento y maldad na mundo? Na manada situacion, porque malo el influencia del religion na gente en vez de bueno?​—Tito 1:16.