Gendeh. Nunca gayot destroza con el tierra y nunca con este quema o cambia. El Biblia ta enseña que ya crea el Dios con este tierra para queda el maga gente hasta para cuando.

•   “El maga recto hay hereda con el tierray hay esta sila alli hasta para cuando.”​—Salmo 37:29.

•   “Ya establicia [el Dios] con el tierra na fuerte fundacion de este; gendeh este move na lugar de este hasta para cuando.”​—Salmo 104:5.

•   “El tierra hay esta hasta para cuando.”​—Eclesiastes 1:4.

•   “El quien ya forma con el tierra, el Creador quien ya establicia con este, . . . nuay crea con este por nuay nada sino ya forma con este para onde puede queda.”​—Isaias 45:18.

 Gendeh permiti el Dios que completamente puede destroza el maga gente con el tierra por medio na polucion, guerra o otro pa cosas. Sino, hay “destroza [el Dios] con el maga destrozador del mundo.” (Revelacion 11:18, El Nuevo Testamento na Chavacano) Paquemodo le con este hace?

 Hay quita el Dios con el todo gobierno del gente cay nuay este abilidad para protege con el tierra y cambia con este un perfecto Reino na cielo. (Daniel 2:44; Mateo 6:9, 10) Hay rula con ese Reino el Anak del Dios, si Jesucristo. (Isaias 9:6, 7) Cuando taqui pa si Jesus na tierra, ya dale le mira que tiene le poder para controla con el maga elemento del tierra. (Marcos 4:35-41) Como el Rey na Reino del Dios, si Jesus hay puede gayot controla con el tierra y con el maga elemento de este. Hay cambia le con el condicion del tierra y hace bira con este igual na jardin de Eden.​—Mateo 19:28; Lucas 23:43.

 Gendeh gayot. Ese falso enseñanza mas mucho estaba na gendeh justo entendimiento del 2 Pedro 3:7 que ta habla: “Ya destina con este cielo y este tierra ahora para destroza na quema.” Considera con este dos importante punto que puede ayuda kanaton para entende si cosa quierre decir de ese maga palabra:

1.   El Biblia ta usa con el maga palabra “cielo,” “tierra” y “quema” para refiri na mas de un cosa. Por ejemplo, el Genesis 11:1 ta habla: “El entero tierra tiene lang un lengguaje.” Aqui, el palabra “tierra” ta refiri na maga gente.

2.   Ta dale mira na contexto del 2 Pedro 3:7 si cosa quierre decir del maga palabra cielo, tierra y quema. Na versiculo 5 y 6, ya menciona acerca con el Avenida na tiempo de Noe. Na ese tiempo, ya destroza con el tierra de antes pero gendeh con el diaton planeta mismo. Sino, el Avenida ya destroza con el maga violente gente o con el “tierra.” (Genesis 6:11) Ya destroza tambien este con el “cielo”​—el maga gente quien ya rula na tierra de aquel tiempo. Poreso, ya destroza con el maga mal gente y gendeh con el diaton planeta. Si Noe y el de suyu familia amo el quien ya salva na destrozo de ese mundo y el quien ya queda na tierra despues del Avenida.​—Genesis 8:15-18.

 Igual na Avenida, el destrozo o “quema” que ya menciona na 2 Pedro 3:7 hay termina con el mundo del maga mal gente y gendeh con el planeta tierra. El Dios ya dale promesa que tiene “un Nuevo Cielo y un Nuevo Mundo, donde el justicia ay reina.” (2 Pedro 3:13) El “Nuevo Mundo” o nuevo maga gente hay queda bajo na rulanza del “Nuevo Cielo” o nuevo gobierno​—el Reino del Dios. Bajo na rulanza de ese Reino, el tierra hay queda un bonito paraiso que tiene paz.​—Revelacion 21:1-4.