Durante el Pascua o Christmas, manada gente el tan cuento acerca con el “tres sabio gente” o “tres rey” quien ya anda con Jesus despues este nace. Pero, gendeh ansina el cosa ya habla el Biblia. (Mateo 2:1) Sino, el escritor de Evangelio que si Mateo ya usa con el Griego palabra ma’goi para refiri con aquellos quien ya visita con Jesus. Posible, este palabra ta refiri na maga experto na astrologia y na otro pa maga practica de demonismo. a

•  Cuanto bilug el “sabio gente”?

•  Maga rey ba el maga “sabio gente”?

•  Cosa el maga nombre del maga “sabio gente”?

•  Cuando ya visita con Jesus el maga “sabio gente”?

•  Ya usa ba el Dios con el “estrella” na Betlehem para guia con el maga “sabio gente”?

 Cuanto bilug el “sabio gente”?

 Nuay habla el Biblia y otro-otro el opinion del maga gente si cuanto sila. Asegun na Encyclopedia Britannica, manada gente na Asia ta creé que tiene 12 persona pero el manada gente na Europe y na America ta creé que tres lang sila, posible cay el Biblia ta habla que tiene tres regalo ya dale con Jesus—“oro, incienso y mirra.”—Mateo 2:11, El Nuevo Testamento na Chavacano.

 Maga rey ba el maga “sabio gente”?

 Durante el Christmas, el maga gente ta hace sale que maga rey el quien ya visita con Jesus. Pero, nuay habla el Biblia que maga rey el maga visita. El Encyclopedia Britannica ya habla que cuanto siglo despues nace si Jesus, el maga gente ya omenta maga detalle acerca na de suyu nacimiento y ya habla que maga rey el maga visita.

 Cosa el maga nombre del maga “sabio gente”?

 Nuay habla el Biblia si cosa el nombre del maga astrologo. Asegun na The International Standard Bible Encyclopedia, tiene maga istoria ta habla que el nombre diila amo Gaspar, Melchor y Baltasar.

 Cuando ya visita con Jesus el maga “sabio gente”?

 Posible, ya visita el maga astrologo con Jesus cuanto meses despues este nace. Sabe kita este cay si Rey Herodes, quien quierre mata con Jesus, ya manda mata con el todo bata hombre que dos el edad pa-abajo. Ya sabe le con el edad de Jesus base na informacion estaba na maga astrologo.—Mateo 2:16.

 Nuay visita con Jesus el maga astrologo na noche que ya nace este. El Biblia ya habla: “Ya anda sila adentro na casa y ya mira sila con el bata y con su nana si Maria.” (Mateo 2:11) Este ta dale mira que cuando ya visita sila, el familia de Jesus ta queda ya na casa y si Jesus gendeh mas un bata que talla na pasungan.—Lucas 2:16.

 Ya usa ba el Dios con el “estrella” na Betlehem para guia con el maga “sabio gente”?

 El cuanto gente ta creé que ya usa el Dios “estrella” de Betlehem para guia con el maga astrologo para con Jesus. Pero considera si porque gendeh se deverasan.

•   El cosa ya mira el maga astrologo que dol estrella ya guia anay kanila para na Jerusalem. El Biblia ya habla: “Tiene maga gente estudiao estaba na Oriente ya llega na Jerusalem. Ya pregunta sila: ‘Donde man el rey del maga Judio, quien amo pa lang ya nace? Ya mira came el disuyo estrella na Oriente y ya vene came para adora con ele.’”—Mateo 2:1, 2.

•   Si Rey Herodes y gendeh el “estrella” el una ya guia con el maga astrologo para na Betlehem. Cuando ya sabe si Herodes acerca con este “rey del maga Judio,” ya investiga le si onde nace el Cristo que ta espera el maga gente. (Mateo 2:3-6) Cuando ya sabe le que na Betlehem, ya habla le con el maga astrologo que anda alla, busca con el bata y bira para reporta con ele.

   Na ese tiempo pa ya anda el maga astrologo na Betlehem. El Biblia ya habla: “Cuando ya acaba sila oi con el rey, ya larga sila y entonces el estrella, que ya mira sila na Oriente, ya anda una canila hasta ya para incima na lugar donde ta queda el bata.”—Mateo 2:9.

•   Cay ya abuya el “estrella,” ya pone na peligro el vida de Jesus y ya resulta na muerte del maga inocente bata. Cuando ya sale el maga astrologo na Betlehem, ya dale kanila aviso el Dios que no bira con Herodes.—Mateo 2:12.

 Cosa ya hace si Herodes? El Biblia ya habla: “Cuando ya sabe si Herodes cay el maga gente estudiao ya hace loco con ele, ya rabia gayot le y ya manda mata con todo el maga bata hombre na Belen [o Betlehem] y maga barrio alrededor, de edad de dos años o menos, asegun el tiempo que ele ya puede sabe con el maga gente estudiao.” (Mateo 2:16) Asigurao que gendeh gayot el Dios el causa de este maldad.—Job 34:10.