El Biblia ya menciona maga cuanto suceso, condicion y custumbre que ta identifica con el “fin del mundo.” (Mateo 24:3; El Nuevo Testamento na Chavacano) El Biblia ta llama con este tiempo como “ultimo maga dia” o “tiempo del fin.”—2 Timoteo 3:1; Daniel 8:19, Easy-to-Read Version.

 El Biblia ya menciona manada cosas que junto-junto sucede que amo el “señal” del ultimo maga dia. (Lucas 21:7) Considera con el cuanto ejemplo:

 Guerra na diferente maga lugar na entero mundo. Si Jesus ya habla: “Maga nacion ay man guerra contra otro maga nacion, y maga reino ay man guerra contra otro maga reino.” (Mateo 24:7) Na igual manera, ya habla na Revelacion 6:4 acerca na un simbolico caballero que ta representa con el guerra que hay “hace gulu na mundo.”

 Escasez de comida. Si Jesus ya habla: “Ay tene donde-donde maga calamidad de hambre.” (Mateo 24:7) El libro de Revelacion ta habla acerca na otro pa simbolico caballero que amo el causa de escasez de comida na diferente maga lugar.—Revelacion 6:5, 6.

 Maga grabe temblor. Si Jesus ya habla que hay tene “maga temblor” na diferente maga lugar. (Mateo 24:7; Lucas 21:11) Ese maga grabe temblor na entero mundo hay causa sufrimiento y bien manada muerte.

 Enfermedad. Asegun con Jesus, hay tene maga “epedemia” de enfermedad.—Lucas 21:11, El Nuevo Testamento.

 Crimen. Maskin pa tiene ya maga crimen por manada siglo, si Jesus ya habla que na ultimo maga dia, hay “omenta el maldad.”—Mateo 24:12.

 Ta destroza con el tierra. El Revelacion 11:18 ya habla que el maga gente hay queda “maga destrozador del mundo.” Hace sila se na manada manera, gendeh lang por medio na violencia y corapcion sino causa tambien sila destrozo na tierra.

 Ta queda mas malo el custumbre del maga gente. Na 2 Timoteo 3:1-4, el Biblia ya habla que mayoria na maga gente hay queda “ingrato y . . . noay lastima, no sabe perdona, chismoso, noay-huya, salvaje, enemigo de todo maga cosa-cosa bueno, traidor, atrivido, loco o [orgulloso].” Ese maga custumbre hay agraba pa na ese tiempo poreso puede gayot habla que hay tene gayot “maga dificultad.”

 Gendeh buen relacion entre na familia. Na 2 Timoteo 3:2, 3, el Biblia ya habla que manada na maga gente hay “queda gayot nuay amor” na diila familia y el maga anak hay queda “desobediente con el di ila tata y nana.” (El Nuevo Testamento)

 Queda nuay amor con Dios. Si Jesus ya habla: “El amor ay queda frio na mayor parte del maga gente.” (Mateo 24:12) El cosa quierre decir de Jesus amo que hay queda frio el amor del mayoria del maga gente con Dios. Na igual manera, el 2 Timoteo 3:4 ta habla que na ultimo maga dia, este maga persona “mas quiere na alegria que con el Dios.”

 El maga gente ta pretende como religioso. Na 2 Timoteo 3:5, el Biblia ya habla que el maga gente hay clama que ta adora sila con Dios pero gendeh sila sigui con el de suyu maga principio.

 Mas ta puede entende con el maga profecia na Biblia. Na libro de Daniel ya habla que “na tiempo del fin,” manada el quien tene el sabeduria acerca na verdad na Biblia, incluido ya el exacto entendimiento acerca na este maga profecia.—Daniel 12:4, footnote.

 Trabajo predicacion na entero mundo. Si Jesus ya habla: “Este Buen Noticia acerca del Reino ay anuncia na entero mundo.”—Mateo 24:14.

 Manada el gangguiador y nuay queber. Si Jesus ya habla que mayoria na maga gente hay ignora con el manada evidencia que cerca ya el fin. (Mateo 24:37-39) Mas pa con ese, el 2 Pedro 3:3, 4 ya habla que el cuanto gendeh creé con el evidencia y hace con ese de nuay nada.

 Hay cumpli el todo maga profecia. Si Jesus ya habla que puede kita identifica con el ultimo maga dia si junto-junto cumpli gendeh lang el cuanto o el mayoria sino todo este maga profecia.—Mateo 24:33.

 Si. El condicion del mundo y el cronologia na Biblia ta indica que el ultimo maga dia ya principia del 1914, el año cuando ya principia el Guerra Mundial I. Para mira si paquemodo el condicion del mundo ta indica que ta vivi ya kita na ultimo maga dia, mira con el siguiente video:

 Del 1914, ya principia rula el Reino del Dios na cielo y el uno na maga primer cosa que ya hace este amo que arria con Satanas Diablo y con el maga demonio estaba na cielo y buta kanila para esta lang sila na tierra. (Revelacion 12:7-12) Puede kita mira el influencia de Satanas na maga gente por medio na diila maga mal custumbre y accion que ta causa para “tene maga dificultad” na ultimo maga dia.—2 Timoteo 3:1.

 Manada gente el quien tan lingasa gayot na este maga dificil tiempo. Ta pensa sila que el maga gente gendeh gayot puede vivi con unidad. Gane, el cuanto ta tiene miedo si cosa pasa na maga gente na futuro.

 Pero, el otro quien ta enfrenta semejante situacion tiene esperanza na futuro. Convincido sila que el Reino del Dios gendeh dura hay actua para termina con el maga problema na mundo. (Daniel 2:44; Revelacion 21:3, 4) Con paciencia sila ta espera con Dios para cumpli con el de suyu maga promesa y ta tene sila comforta por causa na maga palabra de Jesus: “Si quien ay resisti hasta el fin, ay salva gayot.”—Mateo 24:13; Miqueas 7:7.