El Biblia ya promete: “El quien ta hace el querer del Dios ta queda hasta para cuando.” (1 San Juan 2:17, El Nuevo Testamento na Chavacano) Cosa quierre el Dios que hace tu?

•   Aprende acerca con Dios y con el de suyu Anak, si Jesus. Cuando ya reza si Jesus con Dios, ele ya habla: “Este amo el Vida hasta para cuando: Que ay conoce sila con Uste, el unico y deverasan Dios, y que ay conoce tamen sila con Jesus, el Cristo, con quien Uste ya imvia.” (Juan 17:3) Cosa kita hace para “conoce” con Dios y con Jesus? Puede kita conoce kanila si estudia kita con el Biblia y aplica con el mensaje de este na diaton vida. a Puede le na Biblia si cosa el na pensamiento del diaton Creador, si Dios Jehova, el quien kanaton ya dale vida. (Maga Actividad 17:24, 25) Ta habla tambien na Biblia acerca con el de suyu Anak, si Jesus, quien ya enseña acerca na “maga palabra de Vida Eterno.”​—Juan 6:67-69.

•   Demonstra fe na rescate de Jesus. Ya vene si Jesus aqui na tierra “para sirvi y entrega su vida para rescata con mucho maga gente.” (Mateo 20:28) El rescate de Jesus ya hace posible para vivi el maga gente hasta para cuando na Paraiso tierra. b (Salmo 37:29) Si Jesus ya habla: “Ta ama gayot el Dios con el mundo poreso ya dale le con el de suyu unico Anak, para todo quien ta demonstra fe con ele gendeh destroza sino tiene vida hasta para cuando.” (Juan 3:16, NWT) Nota que gendeh bastante que creé lang con Jesus. Debe kita “demonstra fe con ele.” Puede kita se hace si iscuji kita vivi harmonia na de suyu enseñanza y na querrer del de suyu Tata.​—Mateo 7:21; Santiago 2:17.

•   Tiene buen amistad con Dios. Quierre el Dios que queda kita cerca con ele y queda de suyu amigo. (Santiago 2:23; 4:8) El Dios nunca muri y quierre tambien le que el de suyu maga amigo hay vivi hasta para cuando. Por medio na de suyu Palabra, ya habla el Dios si cosa le quierre para con aquellos quien ta busca con ele: “Ojala vivi tu hasta para cuando.”​—Salmo 22:26.

 Gendeh Justo Idea: Boring el vida hasta para cuando.

 Verdad: El vida hasta para cuando estaba con Dios, quien ta ama kanaton y quierre que queda kita alegre. (Santiago 1:17; 1 San Juan 4:8) Sabe le que para queda kita alegre, tiene kita cosa debe hace. (Eclesiastes 3:12) El Dios ya promete que aquellos quien vivi hasta para cuando aqui na tierra hay tiene bonito trabajo que hay dale kanila beneficio y na diila familia.​—Isaias 65:22, 23.

 Mas pa, aquellos quien hay vivi hasta para cuando hay continua aprende maga nuevo cosas acerca na diila Creador y na maga cosa le ya crea. Ya crea le con el maga gente que tiene deseo para vivi hasta para cuando y aprende acerca con ele pero “gendeh gayot puede entende el maga gente con el cosa ya hace el verdadero Dios desde el principio hasta na fin.” (Eclesiastes 3:10, 11) Entonces, aquellos quien vivi hasta para cuando hay tiene maga maka-interes cosas que aprende y hace.