Voluntad del Dios que mas conoce tu con ele, queda tu de suyu amigo y despues, con todo corazon tu ama y sirvi con ele. (Mateo 22:37, 38; Santiago 4:8) Puede tu aprende na vida y maga enseñanza de Jesus si paquemodo hace con ese. (Juan 7:16, 17) Nuay lang si Jesus basta converza acerca el voluntad del Dios sino ya actua le base con ese. Gane, ya habla si Jesus que ya vivi le “gendeh para hace el [de suyu] voluntad, sino para hace el voluntad de Aquel quien ya imvia [con ele].”​—Juan 6:38, El Nuevo Testamento na Chavacano.

Necesita ba yo un señal o vision para sabe si cosa el voluntad del Dios para conmigo?

 Gendeh, cay talli ya na Biblia el mensaje del Dios para na maga gente. Talli escribido el maga cosas que necesita tu para queda “preparao para todo clase de trabajo bueno.” (2 Timoteo 3:16, 17) Para sabe tu si cosa el voluntad del Dios para contigo, quierre le que usa tu con el Biblia junto con el de tuyu abilidad para pensa.​—Roma 12:1, 2; Efeso 5:17.

Puede ba gayot yo hace el voluntad del Dios?

 Si, cay el Biblia ta habla: “El disuyo maga mandamiento gendeh pesao.” (1 San Juan 5:3) Gendeh se quierre decir que pirmi facil sigui con el maga mandamiento del Dios. Pero mas manada el beneficio que hay ricibi tu compara na sacrificio que hay hace tu. Si Jesus mismo ya habla: “Mas alegre pa aquellos quien ta oi y ta obedece con el Palabra de Dios.”​—Lucas 11:28.