El maga scholar tiene grande evidencia que ya existi si Jesus. Acerca na maga comento del maga historiador del primer y ika-dos siglo con Jesus y con el maga Cristiano de antes, el Encyclopædia Britannica, 2002 Edition ya habla: “Este maga istoria ta dale mira que del antes maskin el maga enemigo del maga Cristiano nuay gayot duda que ya existi si Jesus, que ya cuestiona del primer vez maskin nuay bastante evidencia na fin del ika-18 siglo, durante del ika-19 siglo y na principio del ika-20 siglo.”

 Del 2006, el libro Jesus and Archaeology ya habla: “Nuay respetao scholar ahora el ta cuestiona si tiene ba gayot un Judio que ya vivi de antes que el nombre Jesus, anak de Jose; mayoria el ta admiti que ahora manada ya kita cosa sabe acerca na maga cosa le ya hace y na de suyu maga enseñanza.”

 El Biblia ta dale mira que un deverasan persona si Jesus. Puede kita le el maga nombre del de suyu maga tatarabuelo y familia. (Mateo 1:1; 13:55) Puede tambien kita le el maga prominente persona que ya rula na tiempo de Jesus. (Lucas 3:1, 2) Ese maga detalle ya puede ayuda con el maga researcher para confirma que justo el cosa ya escribi na Biblia.