“Cansao esta dispierto hasta ala 1:00 de aga para hace assignment. Bien quierre ya gayot tu durmi.”—David.

 “Tiene vez dispierto pa yo hasta 4:30 de aga para estudia y despues, ta levanta alas 6:00 de aga para anda na escuela. Maka-tamad gayot!”—Theresa.

 Tiene ba tu bien manada assignment? Si ansina, este articulo puede ayuda contigo.

•  Porque el maga maestro ta dale assignment?

•  Maga sugestion para na estudiada

•  Si cosa ta habla el otro jovenes

 El maga assignment puede ayuda contigo para . . .

•   omenta de tuyu saber

•   queda tu responsable

•   enbuenamente tu puede usa con el de tuyu tiempo

•   entende y aplica el maga idea que ta enseña na escuela a

 “El maga assignment amo un manera del maga maestro para asigura que el diila maga estudiante hay aplica con el cosas sila ya aprende en vez de ulvida ya lang con ese.”—Marie.

 Por ejemplo, el math y science puede mejora con el de tuyu abilidad para solva maga problema. Y asegun na maga experto, puede este hace maga nuevo coneccion na de tuyu utuk. Poreso el maga assignment ta sirvi como ejercicio para na de tuyu utuk!

 Ta puede man tu mira el maga beneficio o gendeh, debe tu acepta que el maga assignment parte ya del vida. El buen noticia amo este: Maskin gendeh tu ta puede controla si paquemodo de manada assignment el dale contigo, puede tu hace con el de tuyu assignment na mas corto tiempo. Mira kita si paquemodo.

 Si ta man problema tu hace acaba con el de tuyu assignment, baka necesita tu pensa si paquemodo se hace que gendeh necesita man con sueño o queda bien cansao. Pruba hace con el siguiente.

•   Sugestion 1: Plaña adelantao. El Biblia ta habla: “El maga plano del buen trabajador, asigurao hay tiene buen exito.” (Proverbio 21:5) Prepara el todo cosa tu necesita antes tu principia hace con el de tuyu assignment para gendeh destorba el de tuyu estudiada.

   Iscuji tambien lugar onde puede tu man focus. El cuanto quierre estudia na un silencio cuarto na diila casa que arde el luz. El otro tambien quierre estudia apuera na casa, posible na un library.

   “Puede ayuda el un planner para puede tu arregla enbuenamente con el de tuyu schedule. Si puede tu man monitor con el de tuyu assignment y cuando con ese debe hace, menora el de tuyu stress.”—Richard.

•   Sugestion 2: Arregla con el cosa tu hace. El Biblia ta habla: “Hace todo el maga cosa-cosa . . . con orden.” (1 Corinto 14:40, El Nuevo Testamento na Chavacano) Poreso, decidi si cosa tu una hace na de tuyu maga assignment.

   El cuanto quierre hace una con el maga malisud assignment. El otro ta sinti satisfechao si ta puede sila acaba una con el maga facil assignment. Iscuji con el manera que efectivo para contigo.

   “Ta puede gayot ayuda si tiene tu un lista, para puede tu sabe si cosa tu necesita hace y si cosa tu hace una. Na ese manera, puede tu controla el de tuyu hora y gendeh man pondo el de tuyu maga assignment.”—Heidi.

•   Sugestion 3: Hace dayun. El Biblia ta habla: “Trabaja enbuenamente y no man plojo.” (Roma 12:11, El Nuevo Testamento) No permiti que el otro maga actividad—maskin maka-enjoy este—saca con el tiempo que necesita tu para hace acaba con el de tuyu assignment.

   Aquellos quien tan dulug hace con el diila assignment, gendeh ta alcanza con el deadline de este o paspas lang ta hace con el diila assignment. Y como resulta, nuay sila tanto cosa ta puede aprende na hacida del diila assignment. Gendeh tu sinti ansias o lingasa si hace tu dayun con el de tuyu assignment.

   “Si ta hace yo dayun con el de mio assignment o ta principia dayun con el un project, gendeh ya yo tan lingasa con ese na uliji y ta puede ya yo hace con el de mio otro maga actividad.”—Serina.

   SUGESTION: Hace con el de tuyu assignment na igual hora cada dia. Este puede ayuda contigo para tiene disciplina y tiene regular schedule na hacida del de tuyu assignment.

•   Sugestion 4: Man focus. El Biblia ta habla: “Fija tu adelante.” (Proverbio 4:25) Para puede sigui con este consejo mientras ta estudia tu, necesita tu evita con el maga cosas que puede destorba contigo—especialmente el maga gadget.

   Si man internet tu y man text, tarda tu puede hace acaba con el de tuyu assignment. Pero si man focus tu, menora el de tuyu stress y queda manada el de tuyu vacante tiempo.

   “Dificil man focus, si talli el cellphone, computer, video game y TV. El cosa conmigo ta puede ayuda amo que man off con el de mio cellphone y el otro maga cosas que puede destorba conmigo.”—Joel.

•   Sugestion 5: Queda balance. El Biblia ta habla: “Dale mira el de tuyu pagka-razonable na todo gente.” (Filipo 4:5, NWT) Si necesita, puede tu descanza unrato para gendeh tu queda sobra de stress. Puede tu camina-camina, man bike o man jogging.

   Si ta sinti tu que bien mucho lang siempre el de tuyu assignment, man cuento con el de tuyu maga maestro. Si puede sila mira que ya hace ya tu el todo, baka hace sila maga cambio.

   “No permiti que man stress gayot tu y perde el de tuyu alegria por causa na de tuyu assignment. Hace lang el cosa tu puede hace. No permiti que perde el de tuyu paz na pensamiento por causa lang na cuanto cosas—igual na de tuyu maga assignment.”—Julia.

 Pregunta con el de tuyu mismo cuerpo:

•   Cosa maga cosas el necesita yo para na de mio assignment?

•   Cuando el justo tiempo para hace yo con el de mio assignment?

•   Onde el de con todo buen lugar para man focus yo hace con el de mio assignment?

•   Paquemodo yo puede evita man dulug?

•   Cosa el maga cosas que puede destorba conmigo?

•   Paquemodo yo evita con el cosas que puede destorba conmigo—igual na maga gadget o otro pa?

•   Cosa yo hace para queda balance y gendeh gayot man stress na hacida del de mio maga assignment?

 IMPORTANTE QUE ACORDA: Asigura que ya entende tu el assignment que ya dale. Si tiene tu maga pregunta, atraca con el de tuyu maestro antes tu sale na classroom.