PREGUNTA DEL MAGA JOVENES

Cosa el De Mio Ichura?

MAN PLAY

Porque tu necesita pensa si cosa tu usa? Cay el de tuyu ropa puede dale mira si cosa clase tu de persona. Cosa ta dale mira el de tuyu ropa acerca contigo?

Tres grande kamali acerca na mudada y si paquemodo evita con ese

Kamali #1: Sigui si cosa ta dicta el media.

“Tiene vez, quierre yo usa si cosa el uso cay ta puede yo mira manada advertisement acerca con ese,” ya habla el un teenager que si Theresa. “Si pirmi tu ta pensa con el maga gente quien ta usa ansina maga ropa, hay quierre tambien tu usa igual con ese.”

Gendeh lang el maga mujer afectao na maga advertisement. “El maga hombre ta sigui tambien na uso,” ya habla el libro The Everything Guide to Raising Adolescent Boys. “Maskin bien bata pa sila, el maga negociante ta pricura ya influencia kanila.”

Pruba hace este: El Biblia ta habla: “El inocente ta creé con el todo cosa le ya oi, pero el sabio ta pensa antes hace paso.” (Proverbio 14:15) Harmonia con ese principio, examina si cosa tu ta mira na advertisement. Por ejemplo, si ya mira tu advertisement de ropa que “ipit” o “sexy,” pregunta con el de tuyu mismo cuerpo:

‘Quien ba gayot ta beneficia si sigui yo na uso?’
‘Cosa hay pensa el otro acerca conmigo si usa yo con este clase de ropa?’
‘Ese ba gayot el cosa yo quierre que pensa el otro acerca conmigo?’

Fashion tip: Adentro na un semana, si mira tu un advertisement de ropa, pregunta este na de tuyu mismo cuerpo. Cosa clase de vida sila ta pricura enseña? Ta pricura ba sila convinci contigo que debe tu usa este clase de ropa? “Bien fuerte el pressure que hace perfecto con el de tuyu ichura, perfecto el de tuyu mudada y man hambug que ‘perfecto’ el de tuyu cuerpo,” ya habla el un teenager que si Karen. “Sabe el maga negociante que facil lang influencia con el maga jovenes.”

Kamali #2: Sigui na uso para lang queda igual na otro.

“Si uso el un clase de ropa,” ya habla el un teenager que si Manuel, “el todo hay usa con ese. Si gendeh tu usa ansina, hay juzga contigo el otro.” Uyun con ese el un teenager que si Anna. “El de con todo importante cosa amo que acepta contigo el otro,” ya habla le.

Pruba hace este: El Biblia ta habla: “No ustedes sigui con el maga custumbre de este mundo.” (Roma 12:2) El un manera que puede tu hace con ese amo si mira tu con el de tuyu maga ropa y pregunta con el de tuyu mismo cuerpo:

‘Cosa ya influencia conmigo para iscuji este clase de ropa?’
‘Paquemodo de importante conmigo el maga ropa que branded?’
‘Quierre ba yo man impress el otro gente acerca na de mio ropa?’

Fashion tip: En vez de dos opcion lang iscuji—el uso (y aceptable) o el gendeh uso (y gendeh aceptable)—considera con el ika-tres opcion: tiene confianza na cuerpo y comfortable. Si comfortable tu, gendeh tu man lingasa que sigui na uso para lang queda igual con otro.

Kamali #3: El pensamiento que ‘mas sexy, mas bueno.’

“Deverasan tiene vez, dol bonito usa maga ropa que medio sexy igual na maga ropa que corto o sobra de ipit na cuerpo,” ya habla el un mujer que si Jennifer.

Pruba hace este: El Biblia ta habla: “No ustedes usa maga adorno na cuerpo . . . El de ustedes maga adorno necesita talli adentro na de ustedes maga corazon.” (1 Pedro 3:3, 4) Harmonia con ese consejo, pensa si cosa el mas importante—bonito ropa o buen custumbre?

Fashion tip: El cosa que ta hace bonita o guapo con el un persona amo si modesto le. Deverasan, ese maga palabra gendeh ya uso ahora pero pensa este:

Ya puede ya ba tu man cuento con el un persona quien nuay otro cosa ta discuti sino acerca na de suyu mismo cuerpo? Maka-triste cay ese persona no sabe que ta consumi ya con ele el otro.

El mudada igual na istoria. Si ta saca tu sobra atencion, posible consumi contigo el otro

Si gendeh modesto el de tuyu ropa, queda tambien tu igual con ese persona. Base na de tuyu ropa, dol ta habla tu con otro que ‘mira conmigo’ y hay dale se mira que nuay tu confianza na de tuyu mismo cuerpo o sobra lang tambien tu de bilib na de tuyu mismo cuerpo. Ta dale tambien se mira que falta tu atencion o ta saca pa gane gendeh justo atencion.

Si no quierre tu el atencion del otro, pruba queda modesto. “El pagka-modesto gendeh quierre decir que muda tu igual na de tuyu lola,” ya habla el un teenager que si Monica. “Quierre decir lang de ese que tiene tu respeto con el de tuyu mismo cuerpo y con otro.”