Na este articulo

•  Porque man cuento na personal?

•  Si paquemodo principia

•  Si cosa ta habla el otro jovenes

 El cuanto gente ta habla que dificil y maka-stress que man cuento con el maga gente na personal y mas facil que man text ya lang kanila.

 “Mas maka-pressure man cuento na personal cay gendeh tu puede man edit o borra con el cosa tu habla.”—Anna.

 “Si tan text tu, dol aquel este performance que yan record ya daan. Pero si tan cuento tu na personal, dol aquel tu actual tan perform adelante del manada gente. Poreso si tan cuento yo con otro, pirmi yo ta pensa, ‘Era gendeh yo man kamali!’”—Jean.

 Pero llega el tiempo, necesita tu aprende man cuento con otro na personal. Por ejemplo, necesita tu este si quierre tu tene maga nuevo amigo, tene trabajo o para principia un relacion na un persona.

 Pero, gendeh tu necesita tene miedo que man cuento con otro na personal. Porque? Cay puede lang tu aprende con ese—maskin pa huyain tu.

 “Normal lang tiene vez que man kamali kita na cosa kita ta habla y baka man huya kita. Poreso, no queda bien serioso.”—Neal.

•   Pregunta. Pensa un topico que posible queda interesao el otro maga gente y alli man base el cosa tu habla kanila. Por ejemplo:

   “Tiene ba tu onde ya anda del ya pasa vacacion?”

   “Bale este website. Ya puede ya ba tu mira con este?”

   “Ya sabe ba tu acerca na . . . ?”

   Para queda mas especifico el cosa tu pregunta, pensa un cosa que interesao tu y el persona con quien tu tan cuento. Por ejemplo, igual ba el de ustedes escuela o el de ustedes trabajo? Si ansina, puede tu se hace basejan del de tuyu pregunta.

   “Pensa maga pregunta que interesao tu y quierre tu sabe si cosa el opinion del otro.”—Maritza.

   Acorda: No queda igual na un interrogator que bien manada pregunta. Evita tambien maga bien personal pregunta igual na “Na cosa tu ta tiene gayot miedo?” o “Porque pirmi ya lang tu de blue?” Gane na ika-dos pregunta, dol aquel ta vicia tu kanila!

   Para evita tambien queda igual na un interrogator, habla si cosa el de tuyu opinion acerca na pregunta que ya pregunta tu, antes o despues contesta el persona. Si hace tu se, gendeh queda igual na un interview el de ustedes cuento.

   Principio na Biblia: “El laman del corazon del gente amo igual na hondo agua pero ta puede con ese tabia el gente quien tiene entendimiento.”—Proverbio 20:5.

•   Oi enbuenamente. Para puede man cuento enbuenamente con el un persona, mas bueno que sabe tu oi contra que sabe tu man cuento.

   “Si tan cuento yo con el un persona, ta pricura yo sabe un nuevo cosa acerca con ele. Despues, ta pricura yo acorda si cosa ya le ya habla conmigo para puede yo pensa un bonito pregunta si puede kame man cuento otravez.”—Tamara.

   Acorda: No man lingasa si cosa tu sunod habla. Si oi tu enbuenamente, tiene ya tu cosa puede contesta na cosa ya habla el otro persona.

   Principio na Biblia: “Man alisto ustedes para oi, pero no conversa dayun.”—Santiago 1:19, El Nuevo Testamento na Chavacano.

•   Dale mira deverasan interes. Mas puede tu man enjoy man cuento con el un persona si interesao tu con ele.

   “Si puede sinti el persona con quien tu tan cuento que deverasan tu interesao na cosa le ta habla, mas puede ustedes man enjoy man cuento—maskin pa posible ta sinti tu awkward tiene vez.”—Marie.

   Acorda: Evita maga bien personal pregunta. Baka gendeh gusta el persona si habla tu, “Bale man se de tuyu ropa? De cuanto se?”

   Principio na Biblia: “No ustedes busca el interes lang del de ustedes mismo, sino busca el interes del los demas.”—Filipo 2:4.

 Paquemodo tu puede termina con el de ustedes cuento? “Menciona un bonito cosa,” ya habla el un joven hombre que si Jordan. “Si habla tu con ele, ‘Ya gusta gayot yo man cuento contigo’ o ‘Era man enjoy tu este dia,’ puede se ayuda para mas facil ustedes man cuento na sunod.”