Tiene vez, el cuanto siervo del Dios ta pensa si debe ba gayot sila sigui con el maga principio na Biblia. (Salmo 73:2, 3) Posible pruba sila hace con el maga cosas que gendeh uyun na maga ley de Jehova y despues, ta esconde sila con ese na maga hermano y hermana.

 Este articulo puede ayuda con el aquellos quien tiene doble manera de vida y quierre ya descanza hace con ese.

Na este articulo

•  Cosa el doble manera de vida?

•  Mal gente ya ba yo si tiene yo doble manera de vida?

•  Paquemodo yo descanza con el de mio doble manera de vida?

•  Si cosa ta habla el otro jovenes

 Si tiene tu un doble manera de vida, ta hace tu el maga cosas que gendeh bueno si tan junto tu con aquellos gendeh ta obedece con Jehova; acabar, si junto tu con el maga fiel hermano y hermana na congregacion, ta actua tu que dol quierre tu sirvi con Jehova. Dol tiene tu dos clase de vida y ta usa tu un mascara.

 “Si ta vivi tu un doble manera de vida, pirmi tu tiene cosa ta esconde poreso nuay quien sabe si quien gayot tu. El deverasan, ta hace tu loco con todo.”—Erin.

 Sabe ba tu? Ta vivi tambien tu un doble manera de vida si ta hace tu con el maga cosas que no quierre si Jehova, maskin pa na privado tu se ta hace.

 “Cuando 14 año yo, ya principia yo mira maga imoral cosas na Internet. Si junto yo con otro, dol no quierre gayot yo con el pornografia pero el deverasan, gendeh.”—Nolan.

 Principio na Biblia: “Noay gente quien puede sirvi con dos amo, cay ay odia le con el uno y ay ama con el otro, o ay respeta le con el uno y ay desprecia le con el otro.”—Mateo 6:24, El Nuevo Testamento na Chavacano.

 Gendeh. El deverasan, el cuanto gente no quierre gayot sigui con el maga principio na Biblia. Pero ansina ba gayot tu ta sinti? O baka tiene tu otro razon igual:

•   Ta sinti tu huya cay otro tu na de tuyu maga uban.

•   Ta sinti tu que mas igual ustedes hilig del de tuyu maga uban na escuela compara na maga hermano y hermana na congregacion.

•   Ta sinti tu que gendeh gayot tu puede sigui con el todo mandamiento del Dios.

 “Para conmigo, el cuanto maga jovenes quien tiene doble manera de vida quierre man uban con el maga gente quien gendeh ta sigui con el maga principio na Biblia cay quierre sila tene maga amigo y maskin con quien ya lang sila ta iscuji.”—David.

 Siempre, gendeh este maga valido razon para tene tu doble manera de vida. Pero, ta dale este mira que maskin el maga buen gente puede cae na ese maga trabajo. Si ansina el de tuyu situacion, cosa tu puede hace?

1.  1. Examina con el de tuyu manera de vida ahora. Pregunta con el de tuyu mismo cuerpo: ‘Este clase de vida ba gayot yo quierre? Si continua yo con este, cosa gaha hay sucede?’

    Principio na Biblia: “El un sabio ta puede mira con el peligro . . . pero el nuay experiencia ta continua y hay sufri na mal resulta.”—Proverbio 27:12.

2.  2. Queda honesto. Habla el de tuyu situacion na de tuyu mayores o un mature amigo quien ta sigui con el maga ley de Jehova. Asigurao queda sila alegre si pidi tu ayuda kanila. Y queda sila proud cay quierre tu hace si cosa el justo!

    “Cuando ya admiti yo con otro el de mio maga kamali, uno quel na de con todo dificil cosa que ya hace yo. Pero cuando ya hace yo quel, ya sinti gayot yo alivio.”—Nolan.

    Principio na Biblia: “El quien ta tapa con el de suyu maga culpa gendeh tene buen exito, pero hay dale mira lastima con el quien ta confesa y ta abandona con ese.”—Proverbio 28:13.

3.  3. Acepta con el maga consequencia. Acorda, si tiene tu cosa ta esconde na de tuyu maga mayores y na congregacion, posible man dificil sila que confia contigo. Como resulta del de tuyu maga accion, el de tuyu mayores o maga anciano na congregacion posible gendeh contigo permiti hace maga cuanto cosas. Acepta con aquel maga consequencia y principia na ese tiempo, asigura que “queda honesto na todo cosas.”—Maga Hebreo 13:18, NWT.

    Principio na Biblia: “Oi con el consejo y acepta disciplina para queda tu sabio na de tuyu futuro.”—Proverbio 19:20.

4.  4. Queda convincido que ta ama contigo el Dios. Cay ta ama kanaton si Jehova, sabe gayot le el maga cosa kita ta hace. Poreso, si ta vivi tu un doble manera de vida, sabe se ele y ta hace se con ele triste. Pero cay ‘ta cuida le contigo,’ quierre gayot le ayuda contigo para corecta con el de tuyu kamali.—1 Pedro 5:7.

    Principio na Biblia: “El ojos de Jehova ta mira enbuenamente con el entero tierra para dale mira el de suyu fuerza para con aquellos quien completo el corazon para con ele.”—2 Cronicas 16:9.