•   Cosa el efecto contigo si ta oi tu ta habla mal palabra el otro?

  •  Gendeh yo con ese ta puede nota cay normal ya se conmigo.

  •  Medio umalin oi pero ta acepta ya lang yo con ese.

  •  Ta rabia yo. Gendeh se aceptable conmigo.

•   Paquemodo de pirmi tu ta habla mal palabra?

  •  Nunca

  •  Tiene vez

  •  Pirmi

•   Para contigo, un serioso cosa ba habla mal palabra?

  •  Gendeh

  •  Oo

 Para contigo, un serioso cosa ba que habla mal palabra? ‘Gendeh man,’ posible habla tu. ‘Mas manada problema na mundo el debe kita man lingasa. Todo ta habla man mal palabra!’ Deverasan ba gayot se?

 Creé man tu o gendeh, manada gente el ta evita usa mal palabra. Tiene sila cosa sabe que no sabe el otro. Por ejemplo:

•  Si ta usa tu mal palabra, ta dale tu mira si quien gayot tu. Ta dale mira el de tuyu palabra si cosa tu adentro. Poreso si ta usa tu mal palabra, ta dale se mira que nuay tu queber na sentido del otro. Ese ba gayot el de tuyu personalidad?

   El Biblia ta habla: “El cosa ta sale na boca, ta sale adentro del corazon.”—Mateo 15:18, El Nuevo Testamento na Chavacano.

•  Si ta usa tu mal palabra, puede se causa para pensa negativo el otro contigo. El libro Cuss Control ya habla: “El manera si paquemodo kita ta converza ta determina si respeta ba kanaton el diaton familia o uban na trabajo, el calidad del diaton relacion con otro, si paquemodo kita puede influencia con otro, si puede ba kita saca trabajo o promocion y si paquemodo kanaton trata el otro que gendeh kanaton conoce.” Este tambien ya habla: “Pregunta na de tuyu mismo cuerpo si queda ba mas enbuenamente el de tuyu relacion con otro si gendeh tu ta usa mal palabra.”

   El Biblia ta habla: “No . . . insulta de palabra.”​—Efeso 4:31.

•  Posible el otro pensa que hay queda sila popular si usa sila mal palabra. Na libro How Rude! de Dr. Alex Packer ta habla: “Maka-consumi con el maga gente quien pirmi ta usa mal palabra.” Ele ya omenta que si el un persona pirmi ta usa maga mal palabra, “falta le hondo entendimiento, sabeduria, inteligencia o empatia. Si el de tuyu converzada nuay sirvi, nuay claro y pataca lang, ansina tambien el de tuyu pensamiento.”

   El Biblia ta habla: “No ustedes habla malo.”​—Efeso 4:29.

•  Hace un goal. Adentro na un mes, pruba gendeh habla maga mal palabra. Puede tu lista na un chart o calendario el de tuyu progreso. Pero para gendeh tu habla maga mal palabra, posible mas pa que con ese el cosa tu necesita hace. Por ejemplo:

•  Evita maga entretenimiento donde puede tu oi maga mal palabra. El Biblia ta habla: “El maga barcada malo ta hace cambia el custumbre bueno de un gente.” (1 Corinto 15:33) Incluido na maga “barcada malo” gendeh lang maga gente sino entrao alli el maga entretenimiento​—el maga salida que ta mira tu, el maga video game que ta juga tu y el maga musica que ta oi tu. Si Kenneth que 17 año ya habla: “Facil lang sigui canta con el cancion que quierre tu y gendeh pone atencion con el maga mal palabra na lyrics por causa lang cay bonito de este beat.”

•  Dale mira que mature tu. El cuanto gente ta pensa que dol adulto sila si ta usa sila maga mal palabra. Pero, gendeh se deverasan. El maga mature gente amo aquellos “quien el experiencia ya insiña si paquemodo distingui el bueno y el malo,” ya habla el Biblia. (Maga Hebreo 5:14) Gendeh sila ta usa maga mal palabra maskin pa ta pensa sila que hay “gusta” kanila el otro.

 El mal palabra puede compara na polucion. Igual na polucion que ta hace buling con el aire, el mal palabra ta manda contigo pensa imoral cosas. Bien manada gente ya el ta pensa ansina na este mundo! “No mas ya omenta con ese,” ya anima el Cuss Control. “Hace manera para mentena limpio el de ustedes converzada. Hay queda tu alegre y hay gusta contigo el otro.”