•  Necesita ba gayot yo hace abaja el de mio pesades?

•  Cosa el de con todo buen manera para menora el pesades?

•  El cosa yo puede hace

•  Si cosa ta habla el otro jovenes

 El cuanto maga teenager ta habla que quierre sila queda flaco. Pero . . .

•   Manada el mas interesao na diila ichura contra na diila salud. El cuanto ta hace maga cosas que ta pensa sila que puede ayuda para mas pronto sila queda flaco​—igual como gendeh come o toma medicina para queda flaco. Mas mucho, gendeh efectivo ese maga manera y gane tiene vez, peligroso pa.

   “El cuanto maga mujer gendeh ta come para mas pronto queda flaco. Pero ta causa este peligro na diila salud y necesita pa largo tiempo para queda sila bueno.”—Hailey.

•   Manada el malingasa acerca na diila pesades maskin gendeh sila debe man lingasa con ese. Justo lang el diila pesades​—pero posible ta sinti sila que gordo sila cay ta compara sila diila mismo cuerpo na diila maga uban o na forma del cuerpo que tan advertise el media.

   “Cuando 13 año yo, ya compara yo con el de mio cuerpo na de mio maga amiga. Pensaba yo mas gusta sila conmigo si igual el de mio cuerpo kanila—que dol palito ya lang de flaco.”—Paola.

 Pero el cuanto maga jovenes deverasan necesita menora con el diila pesades. Asegun na report del World Health Organization . . .

•   Na entero mundo, maga 340 millon jovenes que tiene edad de 5 hasta 19 el overweight.

•   Del 1975, cuatro por ciento lang del aquellos quien tiene edad de 5 hasta 19 el overweight. Del 2016, ya subi este na 18 por ciento.

•   Na mas manda nacion na entero mundo, mas manada gente el obese contra na maga underweight.

•   Na maga pobre nacion, manada siempre el obese maskin pa na maga familia que donde el cuanto maga miembro falta nutricion.

 Cosa tu iscuji?

1.   Deja pasa el hambre.

2.   Man exercise y come sustancioso comida.

3.   Toma medicina para queda flaco.

 Justo contestacion: Sugestion 2: Man exercise y come sustancioso comida.

 Posible dayun tu queda flaco si deja tu pasa de tuyu hambre o evita con el cuanto comida. Pero gendeh bueno para na de tuyu salud ese sugestion. Y baka bira lang dayun el de tuyu pesades si bira tu na de tuyu manera de comida de antes.

 Pero si el de tuyu goal amo queda enbuenamente el de tuyu salud, mas bueno el resulta. Si Dr. Michael Bradley ya habla que puede tiene bueno y permanente resulta na salud si cambia kita el diaton lifestyle que puede kita continua hace na diaton entero vida. a El punto? Si necesita tu menora el de tuyu pesades, no tu man focus na diet sino cambia tu el de tuyu lifestyle.

 El Biblia ta habla kanaton que ‘necesita sabe kita controla el diaton cuerpo’​—y incluido ya alli el manera si paquemodo kita ta come. (1 Timoteo 3:11, El Nuevo Testamento na Chavacano) Gane, especifico este ta habla que evita come por de mas. (Proverbio 23:20; Lucas 21:34) Considera con este maga principio y pruba hace con el siguiente:

•   Sabe si cosa comida el sustancioso.

   Gendeh tu debe queda bien istricto acerca na cosa tu ta come. Pero si tiene tu diutay saber acerca na nutricion, puede se ayuda contigo para queda balance na de tuyu comida. Y si balance el nutricion na de tuyu comida, amo se el buen manera para puede tu mentena el pesades que bueno para contigo.

•   Regular man exercise.

   Pensa cada dia si cosa tu puede hace para queda activo. Por ejemplo, en vez de man elevator man escalera ya lang. Usa con el media hora que ta usa tu na video game para camina-camina apuera.

•   Cambia con el junk food na sustancioso comida.

   “Ta pricura yo lleva maga sustancioso comida igual como maga fruta y gulay,” ya habla el un teenager que si Sophia. “Na ese manera, ta puede yo evita come maga gendeh sustancioso comida.”

•   Man hinay-hinay si ta come.

   El cuanto maga gente bien paspas ta come que gendeh ya sila ta sinti que busug ya sila. Poreso man hinay-hinay. Descanza unrato antes saca otravez comida. Posible puede tu pensa que gendeh ya gale tu bien con hambre.

•   Man monitor con el calorie si ta come.

   Le con el nutrition label para puede tu mira si paquemodo de manada el calorie na de tuyu comida. Acorda: El maga soft drink, fast food y dessert tiene bien manada calorie y ta hace se subi el pesades.

•   Queda balance.

   Si Sara que 16 año ya habla: “Pirmi yo ta cunta con el maga calorie que tiene na de mio comida. Si ta mira yo con el de mio plato, puro numero ya lang!” No queda un “calorie accountant.” Tiene vez puede tu come sabroso comida maskin pa manada este calorie.

 Sugestion: Consulta con el de tuyu doctor acerca na de tuyu pesades. Cay sabe le el condicion del de tuyu cuerpo, puede le ayuda contigo para tiene un lifestyle que bueno para na de tuyu salud.