•  Sabe ba tu man multitask?

•  Gendeh justo idea acerca na multitasking

•  Mas buen manera

•  Si cosa ta habla el otro jovenes

 Sabe ba tu man multitask—hace manada cosas na un tiempo lang? Manada gente ta pensa que mas bueno man multitask aquellos quien ya engranda que ta usa ya tecnologia si compara con aquellos quien ya principia con ese cuando adulto ya sila. Pero, deverasan ba gayot se?

 DEVERASAN o GENDEH?

•   Mas pronto tu puede hace con el manada cosas si man multitask tu.

•   Si pirmi tu tan multitask, mas facil ya lang este para contigo.

•   Mas bueno man multitask el maga jovenes si compara con el maga de edad.

 Si “deverasan” el de tuyu contestacion na maskin uno na ese maga pregunta, ya puede contigo engaña el gendeh justo idea del maga gente acerca na multitasking.

 Ta puede ba tu hace dos cosas na un tiempo lang? Posible puede tu junto hace con el cuanto actividad que gendeh ta necesita grande atencion. Por ejemplo, si ta oi tu cancion mientras ta limpia con el de tuyu cuarto, posible puede tu siempre limpia enbuenamente con el de tuyu cuarto.

 Pero, si pricura tu junto hace con el dos cosas que necesita focus, posible gendeh tu puede hace enbuenamente con ese dos. Posible amo se el razon si porque el un joven que si Katherine ya puede habla acerca na multitasking: “Si man multitask tu, hay man mali tu na de tuyu maga trabajo.”

 “Tan cuento yo con el un persona y despues, ya ricibi yo un text que necesita yo man reply. Ya pruba yo con ese junto hace. Como resulta, nuay yo puede oi con el cosa ta habla el persona con quien yo tan cuento y mali el spelling del halos todo palabra na de mio reply.”—Caleb.

 El un experto na tecnologia que si Sherry Turkle ya escribi: “Si tan multitask kita, . . . ta menora el diaton atencion na cada actividad y mas ta queda umalin el resulta. Mas ta tiene gana el diaton utuk si tan multitask kita. Poreso, ta pensa kita que mas ta queda bueno el cosa kita ta hace pero el deverasan, mas ta queda este gendeh bueno.” a

 “Tiene vez, ta pensa yo que puede yo man text mientras tiene conmigo quien tan cuento. Pero el resulta, ta puede yo habla el cosa era yo debe man text y man text el cosa era yo debe habla!”—Tamara.

 El maga gente quien ta pricura man multitask ta hace lang dificil con el diila vida. Por ejemplo, mas ta tarda sila hace acaba con el diila assignment. O gendeh bonito el diila assignment poreso, necesita sila hace con ese otravez. Na ese dos situacion, mas ta queda diutay el diila tiempo para na otro cosas que quierre sila hace!

 Poreso, el psychotherapist y school counselor que si Thomas Kersting ya habla: “Si el utuk igual na un cabinet donde arreglao ta pone con el maga importante informacion, el utuk del persona quien tan multitask igual na un calayat cabinet.” b

 “Si ta pricura tu hace con el manada cosas na un tiempo lang, gendeh tu puede considera con el cuanto importante detalle. Como resulta, mas ta omenta lang el de tuyu trabajo y mas tan sayang el de tuyu tiempo.”—Teresa.

•   Man train con el de tuyu mismo cuerpo que man focus lang na un trabajo. Posible dificil se hace, especialmente si yan anad ya tu junto hace con el maga cosas—por ejemplo, man text mientras ta estudia. Pero el Biblia ta habla kanaton que “asigura el maga cosas que mas importante.” (Filipo 1:10, NWT) Gendeh igual de importante el todo cosa kita ta hace. Poreso, iscuji si cosa tu hace una y concentra na ese trabajo hasta puede tu con ese completa.

   “El pensamiento que gendeh ta puede man focus amo igual na un bata; tiene vez necesita tu man ‘gendeh’ maskin pa mas facil era si deja lang tu el gusto de este.”—Maria.

•   Quita con el maga cosas que puede contigo destorba. Tiene ba tu el tendencia que mira con el de tuyu cell phone mientras ta estudia? Pone con ese na otro cuarto. Apaga con el TV y no pensa acerca con el social media! El Biblia ta habla: “Precura aprovecha embuenamente el tiempo.”—Colosa 4:5, El Nuevo Testamento na Chavacano.

   “Ya puede yo mira que mas bueno si man focus lang tu na un cosa. Mas alegre yo si ta puede yo man check con el un trabajo na de mio lista y principia hace con el sunod trabajo. Satisfechao yo na cosa yo ta hace.”—Onya.

•   Oi enbuenamente con el quien tan cuento contigo. Si ta mira tu con el de tuyu cell phone mientras tiene quien tan cuento contigo, gendeh ustedes man entendijan y ta dale tambien tu mira que nuay tu respeto. El Biblia ta habla kanaton que trata con otro na manera si paquemodo kita quierre que trata sila kanaton.—Mateo 7:12.

   “Tiene vez, si tan cuento yo con el de mio hermana, tan text le o tiene le cosa ta hace na de suyu cell phone. Ta consumi yo! Pero el deverasan, ta hace tambien yo con ese tiene vez!”—David.