Istricto el maga maestro. Fuerte el pressure del maga classmate. Maka-stress el maga exam y bien manada maga assignment. Poreso, maka-entende lang si habla tu que no quierre tu anda na escuela. a El un teenager que si Rachel b ya habla:

 “Mas bueno pa anda na beach junto con el de mio maga amiga o maskin ayuda con el de mio mayores que cuci o limpia contra anda na escuela!”

 Si ta sinti tu igual con Rachel, posible ta sinti tu como un preso que ta espera lang que gradua para puede sale. Posible pa ba que puede tu tene positivo mirada na escuela?

 Sabe ba tu? Si tiene tu positivo mirada na escuela, ta puede tu controla con el situacion y gendeh mas tu mira con el escuela como un problema que necesita lang tu aguanta. Sino, ta queda este un cosa que ta puede ayuda contigo para tene maga abilidad que necesita tu como un adulto.

 Para tene positivo mirada na escuela, man focus con el siguiente:

 El cosa tu puede aprende. El cosa tu ta aprende puede ayuda contigo para solva maga problema na trabajo y na otro aspeto del de tuyu vida na futuro en vez de pirmi lang depende con otro. Pregunta na de tuyu mismo cuerpo, ‘Maskin pa tiene maga cosas na escuela que no quierre yo, cosa yo puede saca na cosa yo ta aprende na escuela?’

 Principio na Biblia: “Guarda con el sabeduria y con el abilidad para pensa.”—Proverbio 3:21.

 El maga calidad que puede tu aprende. El de tuyu rutina na escuela puede ayuda contigo para puede usa enbuenamente con el de tuyu tiempo, tene disciplina na cuerpo y aprende si paquemodo trabaja enbuenamente—maga calidad que hay necesita tu como un adulto. Pregunta na de tuyu mismo cuerpo: ‘Na cosa manera el de mio rutina na escuela puede ayuda conmigo para tene disciplina na cuerpo y queda un buen trabajador? Cosa pa yo puede hace para progresa na este maga calidad?’

 Principio na Biblia: “Tiene beneficio na todo clase de esfuerzo.”—Proverbio 14:23.

 El de tuyu relacion con otro. Cay tan cuento tu na de tuyu maga classmate na escuela, puede se ayuda contigo para cultiva empatia y respeto con otro. “Importante si aprende kita paquemodo man cuento con el maga gente. Igual se de importante si ta aprende kita history y science,” ya habla el un joven hombre que si Joshua. “Un abilidad este que hay usa tu na de tuyu entero vida.” Pregunta na de tuyu mismo cuerpo, ‘Cosa maga leccion el ya aprende yo na escuela acerca si paquemodo trata y comunica enbuenamente con otro—maskin con aquellos quien diferente el background o opinion conmigo?’

 Principio na Biblia: “Precura tene paz con todo.”—Maga Hebreo 12:14, El Nuevo Testamento na Chavacano.

 El de tuyu futuro. El escuela puede contigo ayuda para sabe con el de tuyu maga abilidad y hace maga goal base con ese. El un joven mujer que si Brooke ya habla: “Puede pa gane tu ricibi un especifico training igual conmigo; para si gradua tu, puede tu tene trabajo.” Pregunta na de tuyu mismo cuerpo: ‘Paquemodo yo puede suporta con el de mio mismo cuerpo despues yo gradua? Paquemodo yo puede asigura que el cosa yo ta aprende amo el cosa yo necesita para trabaja?’

 Principio na Biblia: “Sabe si para onde el de tuyu destinacion.”—Proverbio 4:26, Contemporary English Version.