PREGUNTA DEL MAGA JOVENES
Porque No Quierre el De Mio Mayores que Man Enjoy Yo?
Ya invita contigo el de tuyu maga amigo que anda na un party este weekend. Ya pregunta tu con el de tuyu mayores si puede tu anda. Pero ya habla sila, “Gendeh.” Nuay mas tu estraña cay ansina tambien sila ya habla del otro.
Na este articulo
Porque pirmi gendeh ta permiti conmigo el de mio mayores?
Si pirmi contigo gendeh ta permiti el de tuyu mayores que hace si cosa tu quierre, baka pensa tu que no quierre sila que man enjoy tu.
Ese el cosa ya sinti el un teenager que si Marie cuando primer vez le ya tiene cellphone. Ele ya habla: “Manada restriccion ya dale conmigo si Papang—si cosa maga app lang yo puede man download, si con quien lang yo puede comunica y si hasta cosa hora lang yo puede man cuento kanila. Pero el de mio maga amiga, ta puede sila hace maskin cosa sila quierre.”
Pensa este: No quierre ba gayot el tata de Marie que queda le alegre? Na cosa gaha tan lingasa el de suyu tata?
Un restriccion el speed limit. Pero si ta sigui kita con ese, ta protege se kanaton na peligro. Ansina tambien el maga restriccion que ta dale el maga mayores
Pruba hace este: Pensa que un mayores tu y tiene cellphone el de tuyu teenager anak. Cosa posible el de tuyu lingasa? Cosa maga restriccion tu dale para protege con ele? Cosa tu habla si habla el de tuyu anak que no quierre tu que man enjoy le?
“Pirmi ta habla el de mio tata, ‘Pensa tu si etu el na diamon situacion.’ Ya ayuda se conmigo para mira si porque bueno el restriccion que ya dale le y si cosa el razon si porque le quel ya dale. Ta mira yo, si tene yo maga anak, igual tambien el cosa yo hace kanila na cosa ta hace el de mio tata.”—Tanya.
Cosa yo hace para permiti conmigo el de mio mayores?
“Si grita tu na rabia, hay cansa lang tu y el de tuyu mayores. Si purpia tu kanila, hay pensa sila que nuay tu juicio y gendeh pa contigo puede confia.”—Richard.
“Tiene buen razon el de mio mayores si porque gendeh sila conmigo ta permiti na cuanto cosas. Gendeh quierre decir que no quierre sila conmigo que man enjoy. Quierre lang sila que tene yo el buen clase de alegria y gendeh yo man problema na uliji.”—Ivy.
Principio na Biblia: “El nuay juicio ta hace sale todo de suyu sentido pero el sabio ta esta calmao.”—Proverbio 29:11.
“Pa-secreto yo ya desobedece con Papang. Ya pricura yo busca manera para puede yo man message con el de mio maga amiga maskin pa bien denoche ya. Y yan download yo maga app que no quierre si Papang. Nuay dura, ya sabe le se y ya queda le mas istricto conmigo cay gendeh mas le ta confia conmigo. Gendeh gayot bueno que desobedece con el maga mayores.”—Marie.
“Queda paciencioso. Posible, gendeh dayun cambia el de tuyu mayores con el diila restriccion. Pero si ta mira sila que ta obedece tu con ese, baka hay permiti ya sila contigo que hace con el cuanto cosas.”—Melinda.
Principio na Biblia: “Obedece con el de ustedes maga mayores na todo maga cosa-cosa.”—Colosa 3:20, El Nuevo Testamento na Chavacano.
“Si pirmi tu ta insisti con el cosa tu quierre, mas man dificil tu obtene con ese.”—Natalie.
“Quierre el maga mayores que sabe kita hace maga buen decision. Poreso si tan cuento yo con el de mio maga mayores, ta pricura yo dale kanila maga buen razon y gendeh lang basta ta sigui na de mio emocion. Si ta hace yo se, mas grande el posibilidad que permiti sila conmigo.”—Joseph.
Principio na Biblia: “Honra con el dituyo tata y nana.”—Efeso 6:2.