Asegun na un report del U.S. Centers for Disease Control and Prevention, maga media por ciento del todo con quien sila yan interview que tiene edad de 15 hasta 19 el ya experiencia ya oral sex. “Si man cuento tu con el maga teenager [acerca na oral sex], hay habla sila contigo que normal lang se,” ya habla si Sharlene Azam, el autor del libro Oral Sex Is the New Goodnight Kiss. “Gane, para kanila, gendeh se sex.”

•  Cosa de tuyu opinion?

•  Cosa el verdad acerca con ese?

•  Porque este importante?

 Contesta oo o gendeh con el siguiente pregunta.

1.   Puede ba man priñada el mujer si man oral sex le?

   1.   Oo

   2.   Gendeh

2.   Puede ba tene enfermedad el un persona si man oral sex le?

   1.   Oo

   2.   Gendeh

3.   Sex ba gayot el oral sex?

   1.   Oo

   2.   Gendeh

 Compara con el de tuyu maga contestacion na siguiente informacion.

1.   Puede ba man priñada el mujer si man oral sex le?

    Contestacion: Gendeh. Ese el un razon si porque manada gente el ya tiene gendeh justo conclusion que nuay peligro el oral sex.

2.   Puede ba tene enfermedad el un persona si man oral sex le?

    Contestacion: Oo. El un persona quien tan oral sex puede tene hepatitis (A o B), maga genital wart, gonorrhea, herpes, HIV y syphilis.

3.   Sex ba gayot el oral sex?

    Contestacion: Oo. Puede considera como sex el maskin cosa practica que tiene que hace na privado parte del otro persona​—incluido ya el sex, oral sex, anal sex y masturbacion na otro persona.

 Considera con el cuanto texto na Biblia que tiene que hace na oral sex.

 El Biblia ta habla: “Este amo el voluntad del Dios: Que ustedes ay queda . . . lejos [“evita,” NWT] na maga immoralidad.”​—1 Tesalonica 4:3, El Nuevo Testamento na Chavacano.

 Na original lengguaje del Biblia, el palabra que yan translate “immoralidad” ta refiri con el todo relacion apuera del matrimonio, incluido el sex, oral sex, anal sex y masturbacion na otro persona. El un persona quien ta comete sexual imoralidad puede experiencia manada mal resulta y el de con todo grabe de ese amo perde el de suyu buen relacion con Dios.​—1 Pedro 3:12.

 El Biblia ta habla: “El maga gente ta hace cosa [imoralidad], ta peca contra con el disuyo mismo cuerpo.”​—1 Corinto 6:18.

 El oral sex puede causa peligro na fisical y espiritual. Puede tambien este tene negativo efecto na emocion. Asegun na libro Talking Sex With Your Kids, el maga gente que yan sex antes casa tiene vez ta arripinti con ese o ta sinti que nuay kanila queber el diila partner. Deverasan tambien se na otro maga forma de sex.

 El Biblia ta habla: “Yo, si Jehova, el de tuyu Dios, el Quien ta enseña contigo para na de tuyu mismo beneficio.”​—Isaias 48:17.

 Ta creé ba tu que hay beneficia gayot tu na maga ley del Dios acerca na sex? O ta pensa tu con ese como restriccion? Para ayuda contigo contesta con ese maga pregunta, pensa con el un highway que tiene maga caratula acerca na speed limit, traffic signal y stop sign. Ta mira ba tu con ese maga caratula como restriccion o como proteccion? Cosa sucede si etu​—y el otro maga driver—​hay ignora con ese?

 Ansina tambien na maga principio del Dios. Si ignora tu con este, asigurao hay cosecha tu con el cosa tu ya siembra. (Galacia 6:7) “Si deja tu con el de tuyu creencia y maga principio, y hace el maga cosas que ta sinti tu que gendeh justo, perde el de tuyu respeto na de tuyu mismo cuerpo,” ya habla el libro Sex Smart. Pero si vivi tu asegun na maga principio del Dios, puede tu dale mira que limpio tu na moral. Mas pa con ese, hay continua tu tene un limpio conciencia.​—1 Pedro 3:16.