“Ya pricura yo le con el Biblia pero dol tormento con este hace cay bien largo gayot este!”—Briana, 15.

 Ta sinti ba tu ansina? Este articulo puede ayuda contigo!

•  Porque le con el Biblia?

•  Paquemodo yo debe le con el Biblia?

•  Si cosa ta habla el otro jovenes

 Ta sinti ba tu boring si ta le con el Biblia? Si ansina, natural lang se. Posible pensa tu que el Biblia un libro que bien manada pagina que tiene maga diutay letra y nuay maga letrato. Poreso, dol mas enjoy pa mira TV y maga video!

 Pero, pensa con este na ansina manera: Si ya puede tu mira un grande cajon de tesoro, gendeh ba tu queda curioso si cosa el laman de este?

 El Biblia igual na un cajon de tesoro. Ta contene este manada tesoro de sabeduria que puede ayuda contigo para

•   Hace maga buen decision

•   Tene buen relacion na de tuyu mayores

•   Busca maga buen amigo

•   Ganá con el stress

 Porque ese libro de antes bien practical na diaton tiempo ahora? Cay “todo el maga Escritura inspirao de Dios.” (2 Timoteo 3:16, El Nuevo Testamento) Quierre decir, el maga consejo na Biblia estaba na de con todo sabio Persona na universo.

 El un manera para le con el Biblia amo cubri con el entero Biblia. Hay dale se contigo idea si cosa el entero mensaje de este. Tiene manada manera para le con el Biblia. Considera con el dos ejemplo:

•    Puede tu le sunod-sunod con el 66 libro del Biblia, estaba na Genesis hasta Revelacion.

•    Puede tu le con el Biblia base na maga sunod-sunod suceso que ya sucede.

 Tip: El Appendix A7 na New World Translation ta dale el lista del maga importante suceso que sunod-sunod ya sucede na vida de Jesus aqui na tierra.

 El ika-dos manera para le con el Biblia amo iscuji un istoria que relatao na un dificultad que ta enfrenta tu. Por ejemplo:

•   Quierre ba tu incuntra maga amigo que puede tu confia? Le con el istoria de Jonatan y David. (1 Samuel, capitulo 18-20) Despues, usa con el worksheet “How to Find Loyal Friends” para sabe el maga practical leccion na este istoria.

•   Quierre ba tu hace fuerte con el de tuyu abilidad para resisti tentacion? Le con el istoria si paquemodo si Jose ya resisti tentacion. (Genesis, capitulo 39) Despues, usa con el maga worksheet “How to Resist Temptation . . . Joseph—Part 1” y “Falsely Accused! Joseph—Part 2” para aprende maga practical leccion na ese istoria.

•   Quierre ba tu sabe si paquemodo el rezo puede ayuda contigo? Le con el experiencia de Nehemias. (Nehemias, capitulo 2) Despues, usa con el worksheet “God Answered His Prayer” para aprende maga practical leccion na ese istoria.

 Tip: Si le tu con el Biblia, asigura que silencio el alrededor de tuyu para puede tu concentra.

 El ika-tres manera para le con el Biblia amo iscuji un istoria o un salmo, le con este y despues, considera si paquemodo este puede aplica contigo. Despues le, pregunta con el de tuyu mismo cuerpo igual como:

•    Porque si Jehova ya inclui con este na Biblia?

•    Cosa este ta revela acerca na personalidad de Jehova o el manera si paquemodo le ta hace con el maga cosas?

•    Paquemodo yo aplica con este informacion na de mio vida?

 Tip: Usa con el study edition del New World Translation para mira maga video, mapa y otro pa para mas puede tu beneficia na de tuyu lehida de Biblia.