“Puede queda boring el Biblia,” ya habla el un teenager que si Will, “si no sabe tu el justo manera si paquemodo le con ese.”

 Quierre ba tu sabe maga secreto si paquemodo mas man enjoy con el lehida del Biblia? Este articulo hay ayuda contigo.

•  Hace mas real con el Escritura

•  Investiga!

•  Si cosa ta habla el otro jovenes

 Para queda mas real contigo el cosa tu ta le, puede tu hace con este:

1.   Iscuji un istoria na Biblia que quierre tu estudia. Puede tu iscuji un suceso estaba na Evangelio o un istoria estaba na coleccion del maga lehida de Biblia—audio drama na jw.org.

2.   Le con el istoria. Puede tu le con este solo-solo o puede tu le suena junto con el de tuyu maga amigo, amiga o miembro na familia. Tiene un narrator y tiene tambien quien le con el cosa ya habla el maga caracter.

3.   Pruba hace el uno o mas pa na siguiente maga sugestion:

   •   Man drawing con el maga suceso na istoria. O puede tu man drawing un storyboard—maga simple letrato que ta dale mira el maga sunod-sunod suceso que ya sucede. Escribi abajo del letrato si cosa ya sucede.

   •   Man drawing maga diagram. Por ejemplo, mientras ta le tu acerca na un fiel caracter, conecta con el maga calidad y accion del persona na maga bendicion que ya ricibi le.

   •   Hace dol noticia con el istoria. Reporta con el maga suceso estaba na diferente anggulo y inclui “maga interview” del maga importante persona y del maga quien ya mira.

   •   Si uno del maga caracter na istoria ya hace un gendeh justo decision, imagina un cosa que posible era le hace. Por ejemplo, pensa con el tiempo cuando ya nega si Pedro con Jesus. (Marcos 14:66-72) Cosa era el mas buen cosa que ya hace si Pedro cuando yan pressure con ele?

   •   Si quierre tu, escribi con el de tuyu mismo drama base na un istoria na Biblia. Inclui maga leccion que puede tu aprende estaba na ese istoria.—Roma 15:4.

 Si examina tu con el maga detalle, puede tu incuntra maga leccion na un istoria. Gane tiene vez, importante maskin el uno o dos palabra na un istoria na Biblia.

 Por ejemplo, compara con el Mateo 28:7 na Marcos 16:7.

•    Porque ya inclui si Marcos con el detalle que si Jesus hay aparece con el maga dicipulo y “con Pedro”?

•  Clue: Nuay mira si Marcos con este maga suceso poreso ta sale que estaba con Pedro ese informacion.

•  Leccion: Porque asigurao que ya puede ayuda con Pedro cuando ya sabe le que quierre con ele mira otravez si Jesus? (Marcos 14:66-72) Paquemodo ya dale mira si Jesus que deverasan amigo le de Pedro? Paquemodo tu puede imita con Jesus y queda un deverasan amigo con otro?

 Si ta hace tu mas real con el Escritura y ta investiga con el maga detalle, hay mas man enjoy tu mientras ta le con el Biblia!