“Ya anda yo pasia na mall para mira-mira. Cuando ya sale yo, ya puede yo cumpra un caro cosa que nuay na de mio plano para cumpra!”​—Colin.

 Ya admiti si Colin que gendeh le ta puede controla el de suyu gastada. Ansina ba tambien de tuyu problema? Este articulo puede ayuda contigo.

•  Porque debe tu controla con el de tuyu gastada?

•  Si paquemodo con ese hace

•  Si cosa ta habla el otro jovenes

 Falso: Nuay tu libertad si ta pensa tu acerca si onde tu gasta con el de tuyu sen.

 Verdad: Si ta controla tu el de tuyu gastada, hay mas dale se contigo libertad. “Si mas sabe tu acerca na sen, hay mas puede tu tiene el maga cosas tu quierre​—ahora y na futuro,” asegun na libro I’m Broke! The Money Handbook.

 Pensa este: Si controla tu el de tuyu gastada . . .

•   Hay tiene tu mas manada sen para usa si necesita tu con este. “Quierre yo anda na South America na futuro,” ya habla el un teenager que si Inez. “Si ta ajunta yo sen, ta pensa yo con el de mio goal.”

•   Queda poco el de tuyu debe o nuay pa gane. El Biblia ta habla: “El quien ta presta amo esclavo del quien ta dale presta.” (Proverbio 22:7) Uyun con ese el un joven mujer que si Anna. “Puede controla con el de tuyu vida el debe,” ele ya habla. “Si nuay tu debe, puede tu man focus na de tuyu maga goal.”

•   Ta dale tu mira que responsable tu. Ta queda preparao para queda adulto aquellos quien ta controla con el diila gastada. “Un buen training este para na futuro, si vivi ya yo solo-solo,” ya habla si Jean que 20 año el edad. “Ta pricura yo queda responsable na gastada de sen ahora para man anad ya yo se hace na futuro.”

 Acorda: “Si ta man budget tu con el de tuyu sen, ayuda se contigo para queda independiente,” asegun na libro The Complete Guide to Personal Finance: For Teenagers and College Students. “Si controla tu con el de tuyu gastada, ayuda se contigo na de tuyu entero vida.”

 Sabe si onde tu mahina. Si pirmi ta falta de tuyu sen, pensa anay si onde este ta guinda. Para con otro, ta acaba el diila sen por causa na online shopping. Y el otro, ta gasta umpoco pero pirmi. Poreso, ta acaba diila sen.

 “Ta queda grande el maga diutay gasto cada dia. Regalo aqui regalo alla, man coffee shop, cumpra un cosa que tiene discount na grocery maskin gendeh necesita​—na uliji, espanta ya lang tu que nuay mas ya tu sen.”​—Hailey.

 Man budget. El Biblia ta habla: “El maga plano del buen trabajador, asigurao hay tiene buen exito.” (Proverbio 21:5) Si man budget tu, puede tu asigura que gendeh tu gasta sobra na cosa tu tiene.

 “Si ta gasta tu sobra na cosa tu tiene, pensa si onde ta anda de tuyu sen y quita con el maga cosas que gendeh tu necesita. Quita na lista el maga cosas que gendeh necesita hasta mas grande ya el sen que tiene tu contra na cosa tu hay gasta.”​—Danielle.

 Hace con el de tuyu plano. Mucho maga manera para vicia con el de tuyu gastada y evita con el maga gendeh necesita gasto. Ya puede ayuda con el maga jovenes el siguiente:

•  “Ta pone yo de mio sen derecho na banco cay sabe yo gendeh dayun yo con este puede gasta si talla este.”​—David.

•  “Si ta anda yo na mall, exacto lang el sen que ta lleva yo. Na ese manera, gendeh yo ta puede gasta mas na cosa yo ta plaña.”​—Ellen.

•  “Si gendeh dayun yo ta cumpra con el un cosa, mas ta puede yo pensa si necesita ba yo con este o gendeh.”​—Jesiah.

•  “Gendeh yo necesita anda na todo party. OK lang habla gendeh si nuay yo sen para gasta.”​—Jennifer.

 Acorda: Un pesao responsibilidad el man budget con el sen. Amo se ya realiza si Colin, que ya menciona enante. “Si queda yo el cabeza del familia algun dia, gendeh yo puede gasta que gasta con el sen,” ele ya habla. “Si gendeh yo responsable man budget con el sen ahora pa lang que single yo, hay causa este problema si casao ya yo.”