Ta permiti ba contigo el de tuyu mayores que usa social media? Si ansina, puede ayuda contigo este articulo na tres importante aspeto.

Na este articulo

•  Paquemodo el social media ta afecta con el de mio tiempo?

•  Paquemodo el social media ta afecta con el de mio durmida?

•  Paquemodo el social media ta afecta con el de mio emocion?

•  Si cosa ta habla el otro jovenes

 Si ta usa tu social media, dol aquel ta munta tu na un caballo—puede tu controla con este o este el controla contigo.

 “Ta habla yo, cuanto minuto lang yo usa social media pero despues quel, cuanto hora ya gale el ya pasa! Maka-addict el social media y puede este hace usik con el de tuyu tiempo.”—Joanna.

 Sabe ba tu? Maka-addict el social media cay ya diseña con ese na ansina manera. Sabe el maga designer que si mas popular el un site y si mas manada tiempo ta usa el gente con ese, mas grande tambien el pago del maga compania kanila para man advertise con el diila producto.

 Pregunta na de tuyu mismo cuerpo: ‘Gendeh ya ba yo ta puede nota el tiempo si tan scroll yo na social media? Puede ba yo usa con el cuanto de ese tiempo para na mas importante cosa?’

 Si cosa tu puede hace. Decidi adelantao si paquemodo de tarda lang tu usa social media y sigui con ese limitacion.

 “Ya pone yo timer na de mio cellphone que tan lock con el cuanto app despues usa con este adentro del un especifico tiempo. Despues de cuanto tiempo, ya puede se ayuda conmigo para queda balance na de mio usada de social media que gendeh ta hace usik con el de mio tiempo.”—Tina.

 Principio na Biblia: “Usa el tiempo embuenamente.”—Efeso 5:16, El Nuevo Testamento na Chavacano.

 Mayoria del maga experto ta habla que necesita el maga teenager ocho hora de durmida o mas pa cada noche pero manada jovenes el gendeh ta puede hace con ese. El uno del maga razon amo el usada del social media.

 “Ta chequia yo con el de mio cellphone antes yo durmi y na uliji, cuanto hora ya gale yo ya hace usik na mirada na maga post. Uno este na maga cosas que ta pricura yo quita.”—Maria.

 Sabe ba tu? El falta durmida puede causa lingasa y depression na un persona. Asegun na psychology professor que si Jean Twenge, el uno na maga razon si porque nuay na mood el un persona amo cay falta le durmida. Ele ya omenta que si el un persona pirmi falta durmida, puede se causa “problema na pensamiento.” a

 Pregunta na de tuyu mismo cuerpo: ‘Cuanto hora yo ta durmi cada noche?’ ‘Ta usa pa ba yo social media na tiempo que debe era ta descanza ya yo y ta prepara para durmi?’

 Si cosa tu puede hace. No pone cerca onde tu ta durmi con el de tuyu maga gadget. Si posible, no mas ya usa con ese dos hora antes tu durmi. Si necesita tu alarm para dispierta alamañana, pruba usa alarm aquel gendeh na cellphone o na tablet.

 “Tiene vez, denoche ya gayot yo ta durmi por causa na de mio cellphone pero ta pricura yo hace cambio. Necesita yo queda mature y queda mas responsable. Necesita yo durmi temprano para puede yo dale el de mio 100 percent alamañana.”—Jeremy.

 Principio na Biblia: “Asigura el maga cosas que mas importante.”—Filipo 1:10, NWT.

 Asegun na un survey, cerca media del maga mujer na high school quien ya participa el ya habla que “pirmi sila ta sinti triste o nuay esperanza.” El uno na maga posible causa amo el social media. “Si mas grande tiempo tu ta usa na social media y ta compara con el de tuyu mismo cuerpo con otro, mas grande el posibilidad que queda tu depress,” ya habla si Dr. Leonard Sax. b

 “Comon na maga jovenes que compara con el diila mismo cuerpo con otro y mas facil hace con ese por causa na social media. Ta puede tu mira con el maga post del otro por cuanto hora y compara con el de tuyu situacion kanila. O mira con el maga cosas que ta hace el de tuyu maga amigo y pensa que mas alegre sila compara contigo.”—Phoebe.

 Sabe ba tu? Deverasan, puede ayuda contigo el social media para comunica na de tuyu maga amigo pero otro siempre si man cuento tu kanila na personal. “Si ta comunica kita con otro usando el gadget, gendeh se ta hace alegre kanaton igual si tan cuento kita kanila directa,” ya escribi si Dr. Nicholas Kardaras. “Otro gayot el alegria que ta sinti kita si actual kita man cuento con otro.” c

 Pregunta na de tuyu mismo cuerpo: ‘Ta sinti ba yo triste si ta mira con el maga post del de mio maga amigo?’ ‘Ta sinti ba yo que boring el de mio vida compara na cosa ta hace el de mio maga amigo que ta dale sila mira na social media?’ ‘Ta sinti ba yo triste si poco lang o nuay el quien tan “like” con el de mio post?’

 Si cosa tu puede hace. Pruba descanza usa social media adentro del cuanto dia, un semana o gaha un mes. Dale mas tiempo para man junto na de tuyu maga amigo y amiga na personal o na cellphone. Observa si ya menora ba el de tuyu stress y ya queda mas alegre cay ya descanza tu usa social media.

 “Si ta usa yo social media, ya puede yo nota que mas tan focus yo na cosa ta hace el otro gente. Despues yo man delete con el de mio maga account, ya menora el de mio lingasa y dayun lang, tiene ya yo tiempo na maga mas importante cosas.”—Briana.

 Principio na Biblia: “Cada uno debe observa el di suyo mismo trabajo y caracter. Si bueno ese di suyo trabajo y caracter, entonces puede le man alegre del cosa le ta hace. Pero no debe le compara el cosa ta hace le con el cosa ta hace el maga otro gente.”—Galacia 6:4, El Nuevo Testamento.