•  Porque yo gendeh ta puede concentra?

•  Si paquemodo mas concentra

•  Si cosa ta habla el otro jovenes

 “Gendeh ya yo mahilig le maga libro igual de antes. Gane, no quierre ya yo le maga largo parapo.”—Elaine.

 “Si ta sinti yo que matarda el video, tan fast-forward yo con este.”—Miranda.

 “Maskin tiene yo cosa ta hace importante pero si ya suena el de mio cell phone, pirmi yo ta pensa si quien yan text conmigo.”—Jane.

 Tormento ba concentra por causa na tecnologia? El cuanto ta habla si. “Si mas ta usa kita con el Internet, mas tan anad el diaton utuk que gendeh concentra—que pronto man proceso informacion maskin gendeh completo el diaton atencion,” ya escribi el un author y management consultant, si Nicholas Carr. a

 Considera con el tres situacion donde puede hace perde el tecnologia con el de tuyu concentracion.

•   Si tan cuento. “Maskin actual tan cuento adelante del persona,” ya observa el un joven mujer que si Maria, “el maga gente tan text, ta juga o tan social media na diila cell phone—en vez dale el diila completo atencion con el persona con quien sila tan cuento.”

•   Si na clase. “El mayoria del maga estudiante ta habla que ta usa sila con el diila gadget durante el clase para man text, man browse, le o mira maskin cosa video,” ya habla el libro Digital Kids y ta usa sila con este maga gadget “maskin gendeh relatao na clase.”

•   Si ta estudia. “Bien dificil para conmigo que gendeh mira con el de mio cell phone cada vez este suena,” ya habla el 22 año que si Chris. Si un estudiante tu, el un hora assignment puede queda tres hora o mas pa si destorbao tu na de tuyu maga gadget.

 Acorda: Man dificil tu concentra si permiti tu con el tecnologia que destorba y controla contigo.

•   Si tan cuento. El Biblia ta habla: “No ustedes busca el interes lang del de ustedes mismo, sino busca el interes del los demas.” (Filipo 2:4, El Nuevo Testamento.) Dale mira consideracion por medio que oi enbuenamente. Mira con el persona na ojos y no permiti que queda tu destorbao na de tuyu maga gadget.

   “Si tiene tu con quien tan cuento, evita chequia con el de tuyu cell phone. Si ta dale tu con el de tuyu completo atencion con el persona, ta dale se mira que ta respeta tu con ele.”—Thomas.

   TIP: Si tiene tu con quien tan cuento, esconde con el de tuyu cell phone. El maga reseacher ta habla que si talli na presencia el de tuyu cell phone, puede perde el de tuyu focus cay ta expecta tu que suena este.

•   Si na clase. El Biblia ta habla: “Tene ustedes cuidao si paquemodo ustedes ta oi.” (Lucas 8:18) Cosa kita puede aprende con este principio? Si ta permiti usa Internet na de ustedes escuela, no man text, juga o man chat online si necesita tu man focus na cosa tu ta aprende.

   “Pricura pone mas atencion na clase. Escribi maga note. Si posible, sinta adelante na clase para evita maga destorbo.”—Karen.

   TIP: Escribi con el cosa tu ya aprende na papel en vez na computer. Asegun na research, si hace tu se, mas puede tu concentra y acorda con el cosa tu ya aprende.

•   Si ta estudia. El Biblia ta habla: “Saca sabeduria, saca entendimiento.” (Proverbio 4:5) Quierre decir, necesita tu pensa enbuenamente con el cosa tu ta aprende en vez de paspas le con este para lang puede pasa na test.

   “Si ta estudia yo, ta hace yo airplane mode con el de mio tablet y tan focus con el cosa yo ta hace. Gendeh yo ta mira con el maga notification. Si ta pensa yo con el un cosa que necesita yo acorda, ta escribi yo con ese.”—Chris.

   TIP: Estudia na un lugar donde puede tu concentra. Asigura que limpio este y himus.