El un teenager que si Elaine ya habla: “Cuando ya puede yo mira que manada follower online el de mio maga uban na escuela, ya pensa yo, ‘Wow—sikat man se sila!’ Pero el deverasan, tan celos yo umpoco.”

 Ya puede ya ba tu sinti ansina? Si ansina, este articulo puede ayuda contigo evita con el maga gendeh buen efecto si ta pricura queda popular online.

•  Cosa el maga peligro?

•  ‘Un ilusion de pagka-popular’

•  Importante ba el maga followers y likes?

•  Evita que “pasimple man hambug”

 Na Proverbio 22:1, el Biblia ta habla que “mas bueno pa iscuji con el un buen nombre contra na manada riqueza.” Poreso, OK lang si quierre tu tene buen reputacion o maskin desea que quierre contigo el otro.

 Pero tiene vez, el deseo que acepta contigo el otro ta queda bien grande que gendeh mas tu ta sinti alegre si gendeh tu popular. Tiene ba este peligro? Si. El 16 año que si Onya ya habla:

 “Ya puede yo mira maga gente que ta hace maga delicao cosas—igual como ta salta estaba na second floor na diamon escuela—para lang queda popular.”

 Para puede saca el atencion del otro, el cuanto maga gente ta man video con el maga delicao cosas que ta hace sila y ta man post con este online. Por ejemplo, el cuanto maga teenager ta man upload con el diila maga video que ta come maga habon de labada—un cosa que gendeh gayot debe para hace!

 El Biblia ta habla: “No ustedes hace nada por . . . orgullo.”—Filipo 2:3, El Nuevo Testamento na Chavacano.

 Pensa este:

•   Paquemodo de importante para contigo que queda popular online?

•   Hay pone ba tu na peligro el de tuyu salud o de tuyu vida para lang saca el atencion del otro y para gusta sila contigo?

 El maga gente gendeh pirmi ta hace maga delicao cosas para queda popular. El 22 año que si Erica ya nota si cosa el otro manera que ta usa el cuanto gente:

 “El maga gente tan post manada maga letrato del diila vida para dale mira que dol tiene sila manada maga cerca amigo y amiga con quien sila pirmi ta man junto. Un ilusion lang se de pagka-popular.”

 El 15 año que si Cara ya habla que el cuanto gente ta man imbusterias para pensa el otro que popular sila:

 “Ya puede yo mira maga gente que ta saca letrato que ta dale mira que talli sila na party pero el deverasan, talli lang sila na casa.”

 El 22 año que si Matthew ya admiti que ya hace tambien le igual ansina:

 “Yan post yo un letrato y ya pone el locacion ‘na Mount Everest’ maskin el deverasan, nuay pa yo puede anda na Asia!”

 El Biblia ta habla: “Quierre [kita] queda honesto na todo cosas.”—Maga Hebreo 13:18, NWT.

 Pensa este:

•   Si ta usa tu social media, ta man post ba tu un cosa que gendeh deverasan para lang queda mas popular?

•    El maga letrato ba y maga comment que tan post tu ta dale mira si quien gayot tu y si cosa el maga principio tu ta creé?

 Manada gente el ta pensa que para queda popular online, necesita sila tene manada followers y likes. Si Matthew que ya menciona enante ya admiti que ansina tambien le ta sinti del una:

 “Ta pregunta yo con otro si cuanto followers sila tiene o si cuanto el de con todo alto likes que ya tiene sila. Para queda manada el de mio maga followers, ta man follow yo maga gente maskin gendeh yo conoce cay ta pensa yo, man follow tambien sila conmigo. Ya principia yo sinti que necesita yo queda popular. Y mas ya queda este grabe por causa na social media.”

 El 25 año que si Maria ya observa que el cuanto maga gente tan base el diila mirada na diila mismo cuerpo na numero del maga followers y likes que tiene sila:

 “Si yan post el un mujer con el de suyu selfie y nuay le tene manada likes, ta pensa dayun le que malacara le. Siempre, gendeh se justo. Pero manada gente el ansina tambien ta sinti. Dol tan bully sila con el diila mismo cuerpo.”

 El Biblia ta habla: “No kita busca el honor que no sirvi nada y no kita tenta [“man competicion,” NWT] ni man imvidia con uno y otro.”—Galacia 5:26.

 Pensa este:

•   Si ta usa tu social media, ta causa ba este contigo para compara con el de tuyu mismo cuerpo con otro?

•    Mas importante ba para contigo el maga followers contra tene maga deverasan amigo quien ta ama contigo?